Wi snackt platt
Sonntag, 29. Mai 2022, 08:30 bis
09:00 Uhr
“De Noorden op Platt”, so heet en ne'e Fernsehsennen mit plattdüütsche Reportagen un Interviews, de vun nu af an an'n jeden letzten Sünndag in'n Maand in't NDR Fernsehn to sehn is. Bi "Wi snackt Platt" stellt wi Jo de Sennen vör. Dorto maakt wi ok noch en Törn dör de Spiekerstadt un Havencity, un wi sünd op den Ever Margareta in Buxthu, also Buxtehude to Besöök. Dat Schipp warrt düt Johr 125 Johr oolt.
"De Noorden op Platt": Ne'e Fernsehsennen in't NDR Fernsehen
„De Noorden op Platt“ – so heet en ne’e Fernsehsennen, de vun nu af an jümmers an`n letzten Sünndag in’n Maand in`t NDR-Fernsehen to sehn is. An'n 29. Mai, middags halvig twölv is dat dat eerste Mal sowiet. „Den Naam „De Noorden op Platt“, den mutt een sik unbedingt marken, denn bi us steckt würklich de ganze Noorden in de Sendung mit binnen. Of Mecklenburg-Vorpommern, Hamburg, Schleswig-Holstein oder Neddersassen.", seggt Vanessa Kossen, de de Sennen modereern deit.
Vun Boßelsport, Fischerslüüd un een Tohöörkiosk
In de eerste Utgaav vun “De Noorden op Platt” gifft dat to`n Bispeel en Interview mit Johann Heinrich Eden to sehn. Eden is Dreiher vun Beroop un de letzte, de noch Boßelkugeln sülvst maakt hett. Nu höört he op. Denn geiht dat ok noch üm en Fischersmann ut Meckelnborg-Vörpommern, en ne'et nedderdüütsch Theaterstück in Kiel warrt vörstellt, un ut Hamborg gifft dat en Portrait vun Gerd Spiekermann to sienen 70. Geboortsdag to sehn. Ok mit bi de Sennen vun nu af an jümmers mit dorbi is Klappmuulpopp Werner Momsen. In sien Rubrik "Momsen ünnerwegens" stellt he dütmal een "Tohöörkiosk" vör. Werner Momsen: „Dat hett sik in Hamborg een utdacht. Bi de U-Bahn-Statschoon Emilienstraat hett he so`n olen Kiosk anmeet. De Lüüd köönt vörbikamen, de köönt dor rinkamen un mit em snacken. Egaal över wat. Un eerst weer dat een Mann blots un intwüschen sünd dat, glööv ik, al verteihn Lüüd, de dat maakt. All ehrenamtlich. De sitt dor, un wenn du irgendwat op`n Herzen hest, kannst Du dor hengahn un kannst mit jüm snacken.“
Henwies: To sehn is "De Noorden op Platt" vunaf nu jümmers an`n letzten Sünndag in’n Maand - een halve Stünn geiht dat - vun halvig twölv bet klock twölv in´t NDR-Fernsehen un - kloor: achterna kann een sik de Sennen ok noch in de ARD Mediathek ankieken.
Op'n Padd dör de Spiekerstadt un Havencity
Egens arbeidt Sönke Albertsen as Architekt. Man so ganz blangenbi is he noch en heel un deel wunnerboren Stadtföhrer. "Wi snackt Platt"-Reportersch Benita Brunnert is mit Sönke Albertsen ünnerwegens ween un hett sik vun em de Hamborger /nachrichten/hamburg/speicherstadt286_v-contentxl.jpgSpiekerstadt un Havencity wiesen laten.
Henwies: Ji ok mal mit Sönke Albertsen en plattdüütschen Törn dör Havencity maken wüllt, denn gifft dat hier mehr Infos.
125 Johr "Ewer Margareta" in Buxthu (Buxtehude)
In Buxthu, also Buxtehude, dor gifft dat düt Johr en ganz besünner Jubiläum. De Ever "Margareta", de warrt 125 Johr oolt, un, kloor, dat warrt ornlich fiert: mit en grotet Jubiläumsprogramm in’n Haven vun Buxthu. Düsse Daag sünd de letzten Arbeiten an Deck maakt warrn, so dat dat Schipp praat un schier maakt is för de Fier - un "Wi snackt Platt"-Reporter Gerrit Hoss, de hett dor mal an Boord vörbikeken.
Moderatschoon: Jan Wulf
De Leder in uns Sennen:
Ik all alleen - Knipp Gumbo
Hamborg, mien Hoben - Meike Schrader & Wiebke Colmorgen
An Land - Annie Heger
Twischen Ostsee und Nordseestrand - Timsen un sien Lüüd
Dat wer Mai - Ina Müller
Schlagwörter zu diesem Artikel
Plattdeutsch
