Wi snackt platt
Sonntag, 10. April 2022, 08:30 bis
09:00 Uhr
Bi "Wi snackt Platt" stellt wi Jo dütmal de ne'e Utstellen "Platt is bunt" in de Hamborger Zentraalbibliothek vör, maakt en Rundgang över den Ohlsdörper Friethoff, un wi sünd mit den NABU in Wandsbeek ünnerwegens.
Platt is bunt!
Een Utstellen över uns plattdüütsche Spraak un all ehr ünnerscheedlich Facetten, de köönt Ji nu in de Zentraalbibliothek an’n Höhnerposten beleven. Op’e Been stellt hett de Utstellen dat Lännerzentrum för Nedderdüütsch, un för dat, wat to sehn is, weern üm un bi 90 Schölers un Studenten ut den ganzen Noorden an’t Wark. Gerrit Hoss hett sik de Utstellen, de noch den ganzen April lang in'e Zentraalbibliothek to sehn is, för Jo mal ankeken.
Plattdüütsch Dag: Mit Holger Andresen över den Ohlsdörper Friethoff
För de Plattdüütschen in Hamborg, dor is de 23. April villicht de wichtigste Dag düt Johr. Denn dor warrt de Plattdüütsch Dag hier bi uns in’e Stadt fiert. Masse plattdüütsche Lesungen, Kunzerten un Theaterstücken köönt Ji an düssen Dag beleven - un dorto ok noch plattdüütsche Törns: dör Hagenbeck, dör St. Pauli, dör de Hauptkark St. Michaelis. Een Törn, de geiht ok över den woll bekannsten Friethoff vun uns Stadt. Den Ohlsdörper Friedhoff (nich "Karkhoff", wieldat dor keen Kark is). Wat dat dor op düssen Rundgang to beleven gifft, dat vertellt Jo "Wi snackt Platt"-Reportersch Benita Brunnert: Se hett sik mit Holger Andresen, de den Rundgang anbeden deit, al mal op'n Padd maakt un weer ganz hen un weg vun den Törn.
Henwies: De plattdüütsch Rundgang över den Ohlsdörper Friedhoff an’n Plattdüütsch Dag, also an’n Sünnavend, den 23. April, geiht Klock 3 an’n Nameddag los. De Grupp dröppt sik achter dat Huus vun’e Friedhoff-Verwalten an’e Fuhlsbüddler Straat. Kösten deit de Törn 7 Euro - man wohrschau: ji mööt Jo dorför bet to'n 21. April bi Holger Andresen anmellen. Hier gifft dat mehr Infos dorto.
Een Hart för de Natur - De NABU-Stadtdeelgrupp in Wandsbeek
Een Oog op uns Ümwelt to hebben is en wichtig Saak - un dor geiht dat nich blots üm grote Themen as den Klimaschutz un dat Plastik, dat uns Meere dreckig maakt, dor geiht dat ok üm dat, wat direktemang vör uns Döör hier in Hamborg passeren deit. Een Organisatschoon, de sik ok hier bi uns in’e Stadt för den Naturschutz insetten deit, is de NABU. “Wi snackt Platt”-Reporter Bernhard Koch weer annerletzt Mal to Besöök bi de Stadtdeelgrupp vun’n jüm in Wandsbeek un hett dor den Plattsnacker Harald Böttche drapen.
Henwies: wenn Ji Lust hebbt, mittomaken un ok en Stadtdeelgrupp vun’n Naturschutzbund ünnerstütten wüllt, denn findt Ji hier mehr Infos dorto.
Hollywood op Platt: "Kecke Utsichten" bi'n Plattdüütsch Dag
Ji seker se seker noch as Ensemble-Schauspelersch vun’t Ohnsorg Theater: Sandra Keck. Ok se köönt Ji an’n 23. April bi’n Plattdüütsch Dagin Hamborg beleven. Nameddags Klock Twee geiht dat los in’e Staatsbibliothek an’e Uni. “Kecke Utsichten” heet ehr Programm. Un dormit Ji al mal to weten kriegt, wat för en wunnerbare Geschichten-Vertellersch Sandra Keck is, hebbt wi för Jo en Klassiker ut uns Reeg "Hör mal’n beten to" vun ehr för Jo rutsöcht.
Moderatschoon: Jan Wulf
Schlagwörter zu diesem Artikel
Plattdeutsch
