Wi snackt platt
Sonntag, 27. März 2022, 08:30 bis
09:00 Uhr
"Op Platt" so heet dat ne'e Album vun "Norma", dat se jüst düssen Freedag rutbröcht hett. Wi snackt mit de junge Sängersch ut Hamborg un, kloor, gifft dat bi "Wi snackt Platt" ok den een oder annern Song vun't ne'e Album to höörn. Dorto geiht dat bi uns ok noch üm twee Theaterstücken op Platt, de Ji in de tokamen Tiet beleven köönt: wi sünd bi Tanks Theater in Noordersteed to Besöök - dor löppt vunaf Dunnersdag de beten wat frivole Kummedie “Keen Appel för Eva”, un de Nedderdüütsche Volksbühn in Geesthacht speelt vunaf Sünnavend den groten Ohnsorg-Klassiker “Müggensack sien Venus”.
"Op Platt" - Ne'e Musik vun Norma
Op de Insel Föhr is se opwussen, man siet vele Johrn in Hamborg tohuus: "Norma". Jüst düssen Freedag hett de 34 Johr oolt Sängersch ehr ne'et Album rutbröcht. "Op Platt" heet dat, un - as de Naam al seggt - dor op sünd söss wunnerbare Pop-Songs op Plattdüütsch. Bi "Wi snackt Platt" vertellt Norma, de sünst ok op Hochdüütsch und Freesch singt, woso se nu een Album ganz alleen op Platt schreven un opnahmen hett, man se snackt ok vun ehrn Droom as lütte Deern op Föhr, eenmal Sängersch to warrn un woans düsse Droom denn later in Hamborg wahr worrn is.
"Müggensack sien Venus": Ohnsorg-Klassiker in Geesthacht to beleven
En ganze Tiet lang güng wegen Corona meist gar nix bi de mehrsten Amateurtheaterbühnen in Hamborg un ümto. Man nu deit sik wedder wat: so ok bi de Nedderdüütsche Volksbühn in Geesthacht: dor schall an’n tweten April de Premieer vun de Kummeedi „Müggensack sien Venus“ över de Bühn gahn. "Wi snackt Platt"-Reporter Bernhard Koch weer annerletz bi en Proov dorbi un stellt Jo de Schauspelers un dat Stück mal vör.
Henwies: De Premieer vun "Müggensack sien Venus" vun de Nedderdüütsche Volksbühn Geesthacht is an'n Sünnavend, den 2. April. Speelt warrt dat Stück noch bet to’n söventen Mai in "Das Kleine Theater in der Schillerstraße" in Geesthacht. Dor gifft dat ok de Korten to köpen.
Tanks Theater in Noordersteed speelt "Keen Appel för Eva"
Dat mit de Eh is ja so een Saak: en Leven lang den sülvigen Partner, dat is för Mennigeen nix. Un so mag dat denn ween, dat de een oder anner sik jichenswann ok na anner Froens- oder Mannslüüd ümkieken deit un fremd geiht. Wat denn gau ok Arger in’e Partnerschop bringen kann… Man wat is, wenn beide sik doröver eens sünd, dat Fremdgahn ok is? Is denn allens veel lichter? Üm düt Thema un allens, wat en "Offene Ehe" sünst noch so mit sik bringen deit, dreiht sik dat in de Kummeedie “Keen Appel för Eva”. Vunaf Dunnersdag, den 31. März un noch bet to'n 10. April is dat Stück bi Tanks Theater in Noordersteed to beleven. "Wi snackt Platt"-Reportersch Benita Brunnert hett för Jo mal bi en Proov vörbikeken.
Moderatschoon: Jan Wulf
De Leder in uns Sennen:
Sommerregen - Gerrit Hoss
Cool bliem - Godewind
Op bald - Norma
Mien Weg - Norma
Hamborg - Norma
Schlagwörter zu diesem Artikel
Plattdeutsch
