Wi snackt platt
Sonntag, 27. Februar 2022, 08:30 bis
09:00 Uhr
Dütmal geiht dat bi "Wi snackt Platt" üm en Glücksdaagbook, en plattdüütschen Heiraatsandrag un en Student, de siene Masterarbeit op Platt schrieven deit.
Opschrieven, wat glücklich maakt: Dat "Glücksdaagbook"
Dat Lengen na de Fröhjohrstiet, dat wart jümmer grötter. Un wenn Ji nu ok meent, dat Ji noog hebbt vun düsse griesen Winterdaag un dat Ji en lüttbeten wat to’n Opmuntern bruken künnt, denn weer villicht ok en "Glücksdaagbook" wat för Jo. De Idee dor achter is, dat een sik eenfach mal Gedanken över all dat Schöne in sien Leven maakt, un een jedeen Dag dat, wat em glücklich maakt, in een Daagbook opschrifft. Lisa Wrogemann hett sik dat mit dat "Glücksdaagbook" utdacht un Gerrit Hoss weer bi ehr to Besöök.
En Heiraadsandrag op Platt
Plattdüütsch is en wunnerbore Spraak: Plattdüütsch gifft uns en Geföhl vun Heimat, mit Plattdüütsch föhlt wi uns tohuus. Man de plattdüütsche Spraak, de kann noch so veel mehr. Denn Plattdüütsch kann ok dat Leven verännern un Di glücklich maken! Dat weer tominnst bi Corinna Reyer so. Ehr Partner Stefan Küther hett ehr fraagt, wat se em heiraden will. Maakt hett he dat op Platt. Wat se "jo" seggt hett un wat de Plattdüütschen Narichten bi NDR 90,3 dormit to doon hebbt, dat vertellt wi Jo bi "Wi snackt Platt"
Een Masterbeit nich ÖVER man OP Platt
Vun Opsätz över dat plattdüütsche Vokalsystem bet hen to Diplomarbeiden över Plattdüütsch an’e Scholen: Dat Studenten an’e Uni ok mal to nedderdüütsch Themen forschen doot oder jümehr Afslussarbeiten över dat Thema Plattdüütsche Spraak schrievt, dat is haalfwegs normaal. Aver dat en Student siene Afslussarbeit nich ÖVER Plattdüütsch, man heel un deel OP Platt schrieven deit - un twors över en Thema dat överhaupt nix mit Plattdüütsch to doon hett - dat is denn doch wat heel Besünners. Kevin Behrens de maakt dat: he schrifft siene Masterarbeit to't Thema Gebärdenspraak heel un deel op Platt. Frank Jakobs hett Kevin Behrens in siene Studenten-Buud in Bremen drapen.
Moderatschoon: Jan Wulf
De Leder in uns Sennen:
Leev, kaam un bliev ín mien Huus - Knipp Gumbo
Hamborg, mien Hoben - Meike Schrader & Wiebke Colmorgen
Fröhjohrsbloom - Valentine & The True Believers
De lange Dag - Lars & Dixi
Nees in Wind - Ina Müller
Schlagwörter zu diesem Artikel
Plattdeutsch
