Wi snackt platt
Sonntag, 02. Januar 2022, 08:30 bis
09:00 Uhr
In uns eerste Sennen in't ne'e Johr hebbt wi fix wat to Lachen för Jo: Freit Jo op plattdüütsche Geschichten vun Jan Fedder, Reimer Bull, Gerd Spiekermann un den Poetry Slammer Sven Kamin.
Jan Fedder vertellt "De Reis na Hamborg"
He weer nich blots en Hamborger Jung, man ok en wunnerbaren Plattsnacker un Geschichten-Verteller: Jan Fedder! Twee Johr is dat nu her, dat he - veel to fröh - in´t Öller vun 64 Johr storven is. Bi "Wi snackt Platt" wüllt wi em nochmal höörn so as wi em kennt hebbt mit de Geschicht vun en Ehepaar, dat vun de Insel Fehmarn kümmt un en Reis na Hamborg maakt.
"De swatte Placken"
Wo dat üm lustige Geschichte geiht, dor is he nich wiet: Gerd Spiekermann! Siet meist fiefunveertig Johr steiht he as Verteller op’e Bühnen vun gaanz Noorddüütschland, un en Geschicht is dor jümmers wedder to höörn: De Geschicht vun den "swatten Placken.
Leevde twischen Suurkruut
Ok bi Reimer Bull geev dat jümmers veel to Lachen, wenn he op'e Bühn stahn dee. Bi "Wi snackt Platt" höört Ji nochmal de Geschicht vun de "Leevde twischen Suurkruut" un wat Reimer Bull in siene Jugendtiet nich allens op sik nahm hett, üm bi de Deerns en goden Indruck to schinnen.
Hett Tom, de Katt, den Bonbon nahm?
Sven Kamin, dat is en düütschen Poetry-Slammer ut Wedel, de al veel Priesen afrüümt hett. He weer ok faken mit dorbi, wenn de NDR siene Poetry Slams op Plattdüütsch maakt hett. Kamin kann nich so dull Platt, dat hett he sülvst mal seggt. Man mit düt Manko kann he goot ümgahn, un sien Speel mit Wöör hett dat in sik! Freit Jo op de Geschicht vun Tom, de Katt. Hett se den Bonbon nahm, oder nich!? Dat wart Ji gewohr bi "Wi snackt Platt".
Moderatschoon: Jan Wulf
De Leder in uns Sennen:
Op di luert - Farvenspeel
These boys must be free - Nick, Yared & Floy feat. The Charchullas
Petticoat un Pocorn - Godewind
Marie Marie - Knipp Gumbo
Dörp raggae - Ina Müller
Schlagwörter zu diesem Artikel
Plattdeutsch
