Wi snackt platt
Sonntag, 12. Dezember 2021, 08:30 bis
09:00 Uhr
Wat schenk ik mien Verwandschop un mien Frünnen to Wiehnachten!? Wenn Ji Jo düsse Fraag noch stellt, denn höört man nipp un nau hen in düsse Utgaav vun "Wi snackt Platt".
Winter in de Lütthasenschool
"Die Häschenschule" – oder op Platt de „Lütthasenschool“, dat is en Billerbook, dat Ji villicht ok noch ut Joon Kinnertieden kennt. Siet meist 100 Johr gifft dat nu de Geschichten vun Hasenhans un Hasengretel. Albert Sixtus hett de Vertellen 1924 in Riemels opschreven, un de Illustrator Fritz Koch-Gotha hett de Biller dorto maalt. En lange Tiet geev dat ok blots düt een Book vun’e Lütthasen-School, man denn, 60 Johr na Albert Sixtus sien Doot, is noch en tweten Deel opdükert - un de, de is nu ok op Platt rutkamen. Lina Band hett sik dat Billerbook, dat in'n Husum-Verlag rutkamen is, ankeken un stellt Jo dat vör.
Böker, CDs un mehr bi "Plattschapp.de"
En Internetsiet, wo Ji allens bestellen köönt, wat dat so op den plattdüütschen Böker- un CD-Markt gifft, dat is Plattschapp.de. Signe Frese-Preis un Heiko Frese bedrievt de Websiet, un de Idee, plattdüütsche Literatur mehr ünner de Lüüd to bringen, de keem em al in de Negentiger Johren. 2002 hett Heiko Frese denn anfungen, de Internetsiet plattschapp.de to programmeren un na un na en Internethannel opbuut. Gerrit Hoss, de hett de hett Signe Frese-Preis un Heiko Frese mal bi em tohuus in Lümborg (Lüneburg) besöcht.
To Besöök op'n Wekenmarkt bi Heike Westphal
Vele Lüüd söökt en Leven lang na jümehrn Droomjob. Mennigeen findt em, mennigeen nich. Heike Westphal, de hett ehrn Droomjob funnen: Se is Feinkosthökersch op de Wekenmarkten in Volksdörp un Wellingsbüddel. Goden Klönsnack, geern ok mal op Platt, un dorbi leckere Saken verköpen – Heike Westphal is bannig froh, dat se nich mehr in de grote Tähndokterpraxis arbeiden deit, wo se fröher togang weer. Denn dat weer en Tiet, dicht vullpackt mit Stress. "Feinkost Gatermann" steiht op den Verkoopswagen, den se vun ehrn Broder övernahmen hett. Un wenn vörn an den Wagen de grote Klapp opgeiht, denn is dat för Heike Westphal so, as wenn se op en Bühn stahn dee. So as se ok in ehr Freetiet op en richtige Bühn steiht: bi en Theatervereen. Bernhard Koch hett Heike Westphal bi de Arbeidt besöcht un stellt Jo de Feinkosthökersch vör.
Moderatschoon: Jan Wulf
De Leder in uns Sennen:
Ganz goot - Norma Schulz
Straat nah Westen - Otto Groote Ensemble
Keener weet dat ganz genau - Godewind
Dat Joahr geiht toenn - Rolf Zuckowski
An Land - Annie Heger
Schlagwörter zu diesem Artikel
Plattdeutsch
