Wi snackt platt
Sonntag, 04. Juli 2021, 08:30 bis
09:00 Uhr
Bi "Wi snackt Platt" dreiht sik dat dütmal üm dat NDR Chor-Experiment un wi kiekt mal na de Volkshoochschool hen, wo se Lüüd söökt, de Plattdüütsch ünnerrichten köönt.
Dat Du min Leevsten büst - Dat NDR-Chorexperiment
Endlich is dat wedder so wiet, dor dröfft een in'n Chor tohoop Musik maken un singen. De eersten Proven sünd in Gang – in Telten, Parks oder in'e Goorns. Un ok wenn dat dor wegen de Corona-Süük ümmer noch'n poor Inschränken bi gifft, sorgt dat Singen doch buten in'e fre'en Natur för en groot Glücksgeföhl.
Maakt mit!
De NDR bringt nu rund üm dat Singen en Experiment op'n Weg, wo all mit jümehr Stimmen mit bi ween köönt. Veer Lüüd vun'n NDR Chor maakt den Anfang un singt den noorddüütschen Klassiker slechthin: "Dat Du min Leevsten büst". Un ut de veer Stimmen schüllt an't Enn denn ganz veel vun warrn. Man de Fraag is nu: Kriegt wi dat hen un maakt wi dor den gröttsten Chor vun ganz Noorddüütschland ut?
De VHS söcht Lüüd
Vun Ina Müller kummt de Snack "Plattdüütsch is nich uncool" un mehr un mehr Lüüd seht dat jüst so. Man blots: Vele köönt de Spraak nich mehr snacken oder se hebbt dat noch gor nich utprobeert. Dorüm sünd ok bi de Hamborger Volkshoochschool de Kursen ümmer goot besöcht. Man faken fehlt dat an Lüüd, de ok Plattdüütsch ünnerrichten köönt. Bi "Wi snackt Platt" weet wi düssen Sünndag noch'n beten wat mehr to to vertellen. Un wokeen Lust hett, Platt to ünnerrichten, nimmt op't best mal Kontakt to dat VHS-Zentrum Noord in Barmbeek op – geern per Mail an nord@vhs-hamburg.de (Info: Dat VHS-Büro is in'e Tiet vun'n 10. Juli bet to'n 1. August dicht un nich besett).
Un kloor gifft dat blangen dat NDR Chor-Experiment un Platt bi de VHS noch de een oder anner Geschicht op Platt to hören. Un bavento kriegt Ji in’e Sennen denn noch en ganze Reeg plattdüütsche Musik op'e Ohren.
Moderatschoon: Jürgen Fitschen
De Leder in uns Sennen:
Rollin Home – Lui & Fiete
Mank all mien Drööm – Iko Andrae
Buten Kluten – Ina Müller
Mien Gott he kann keen Plattdüütsch mehr – Knut Kiesewetter
Kring ut Füer – Knipp Gumbo
