Wi snackt platt
Sonntag, 22. Mai 2022, 08:30 bis
09:00 Uhr
Dütmal sünd wi in’n Loki-Schmidt-Goorn in Lütt-Flottbek ünnerwegens, wi besöökt de Grönen Daams un Herren vun't Agaplesion Bethesda-Krankenhuus in Hamborg-Bardörp, un dorto geiht dat ok noch üm de Patriotsche Sellschop Hamborg un dat Thema Denkmaalschutz.
De Grönen Daams un Herren vun't Bethesda-Krankenhuus
Vele Saken, de mit Ehrenamt un Freewilligenarbeit to doon hebbt, de sünd in'e Corona-Tiet inslapen oder hebbt so vör sik hendümpelt. Nu geiht dat aver so suutje-piano wedder los, un ok vele Krankenhüüs söökt Lüüd, de mithölpen doot. To'n Bispeel bi'n Besööksdeenst vun de "Grönen Daams un Herren". De ehrenamtlichen Hölpers sünd in Krankenhüüs ünnerwegens. Kranke Minschen köönt mit jüm snacken oder bi jüm jümehr Harten utschüdden. "Wi snackt Platt"-Reporter Bernhard Koch hett sik annerletz mal mit een vun de "Grönen Daams" vun't Agaplesion Bethesda-Krankenhuus in Hamborg-Bardörp drapen: mit Helga Krätzig.
De Loki-Schmidt-Goorn in Lütt Flottbeek
De Fröhjohrtiet, de is vull in'n Gang, un an de bunten Blomen hier bi uns in’e Stadt kann een sik gar nicht satt sehn. Besünners schön bleut dat in’n Ogenblick ok in'n Loki Schmidt-Gaarn - in Lütt Flottbeek. Gerrit Hoss, de weer dor för uns mal kieken un rüüken - un he hett dorbi sogor noch wat över de Bibel lehrt.
Henwies: An'n 11. Juni is Plantenbörs in’n Loki-Schmidt-Gaarn. Morgens, Klock 9 geiht dat los.
De Patriotsche Sellschop Hamborg un de Denkmaalschutz
De Patriotsche Sellschop in Hamborg is en Vereen, de sik op ganz besünner Oort för de Lüüd un dat Gemeenwoll hier bi uns in’e Stadt insetten deit. Masse ehrenamtliche Liddmaten hett de Vereen, de sik ut ölven verscheden Arbeitskrinks un Projekt-Gruppen tohoopsetten deit. Un een vun düsse Arbeitskrinks, dat is de Arbeitskrink, de för dat Thema Denkmaalschutz tostännig is. Benita Brunnert, de stellt wull mehr över de Arbeit vun de Patriotsche Sellschop weten un hett sik mal mit en Liddmaat vun den Arbeitskrink Denkmaalschutz drapen.
Moderatschoon: Jan Wulf
De Leder in uns Sennen:
Sommerkinner - De Tüdelband
Dänz op de Deel - Yared und die Schlickrutscher
Sömmernacht - Jan Cornelius
Marie Marie - Knipp Gumbo
Op bald - Norma
Schlagwörter zu diesem Artikel
Plattdeutsch
