Wi snackt platt
Sonntag, 04. September 2022, 08:30 bis
09:00 Uhr
Betlang geev dat dat Plattdüütsche Wöörbook blots as Book, man nu siet verleden Dunnersdag, dor kann een ok allens in’t Internet finnen. Dulle Saak! Wi stellt Jo dat Online-Wöörbook vör un hebbt dat ok mal utprobeert. Denn weern wi ok noch bi de Premieer vun den Ohnsorg-Klassiker “Dat Hörrohr” dorbi, un wi sünd bi de St. Serverini-Kark in Kirchwarder to Besöök.
Plattdüütschet Wöörbook "der neue SASS" - nu ok online!
För vele Plattsnackers un -schrievers is dat Wöörbook „der neue SASS“dat, wat de Duden för de Hoochdüütschen is. Siet mehr as 20 Johrn gifft dat den Sass as Book ut Papeer, man nu is dat Wöörbook ok in't Internet to finnen - mit mehr as 180.000 Begrepen. Uns “Wi snackt Platt”-Reporter Helge Albrecht, de hett een Fro drapen, de den ne’en Online-SASS mal för uns utprobeert hett.
Nostalgie pur: De Premieer vun "Dat Hörrohr" in't Ohnsorg Theater
“Dat Hörrohr” - so heet en vun de ganz groten Klassikers vun dat Ohnsorg. Een echten Stratenfeger weer dat Stück, as dat 1960 dat eerste Mal in’t Fernsehn to sehn weer - mit Otto Lüthje in de Hauptrull as Opa Meiners.. Verleden Sünndag, dor hett nu een Neeoplaag vun dat Stück Premieer in’t Ohnsorg Theater fiert. Wi weern dorbi un vertellt Jo, wat sik dat lohnt sik dat Stück antokieken - oder nich.
Tag des offenen Denkmals: Besköök in'e St. Severini-Kark in Kirchwarder
Ole Hüüs erkunnen, Lüchttorns, Möhlen oder Karken un deep indükern in vergahn Tieden. Jeedeen Johr gifft dat in Düütschland den so nöömten „Tag des offenen Denkmals“ un tokamen Sünndag, den 11. September 2022, dor is dat wedder sowiet. Un dormit Ji mal weet, wat för Smuckstücken Ji Jo denn ok hier bi uns in Hamborg an düssen Dag ankieken köönt, hebbt wi Jo mal en Bispeel rutsöcht: Bernhard Koch weer för Jo in’e St. Severini-Kark in Kirchwarder to Besöök.
“Heikos” - Dat Plattdüütsche Hörspeel bi NDR 90,3
Düssen Middewekenavend vunaf Klock fief na negen is wedder Plattdüütsch-Hörspeeltietbi uns bi NDR 90,3 - un ok dütmal hebbt wi wedder en ne’e Episood ut uns Hörspeelreeg „Seker is seker“ för Jo, wo dat üm de Versekerungsagentin Jackie Theeßen geiht un wat de so allens in ehrn Job beleveevt. Düsse Episood is vun Helga Bürster un hett den Titel „Heikos“. Bi "Wi snackt Platt" vertellt Jo Ilka Brüggemann mehr dorto.
Moderatschoon: Jan Wulf
De Leder in uns Sennen:
- Born, wo de Wind herkümmt - Charly Beutin & seine Schreckschussband
- Sommeregen - Gerrit Hoss
- Lüttje Glück - Die Tüdelband
- Ik all alleen - Knipp Gumbo
- Dat wer Mai - Ina Müller
