Wi snackt platt
Sonntag, 12. März 2023, 08:30 bis
09:00 Uhr
Anfang März is in'n Bunnsdag veel wat över Platt snackt worrn. Un wat man sik anfangs villicht nich so recht vörstellen kunn: Dorbi is ok veel wat op Platt snackt worrn. De Debatt hett över en Dreeviddelstünn lang anduert. Grund is de Johrsdag vun'e Europääische Charta för Regionaal- oder Minnerheitenspraken ween, de dat nu al siet 25 Johr geven deit. De Sprakencharta gifft blangen Däänsch, Freesch, Soorbsch un Romanes as Minnerheitenspraak ok Plattdüütsch as Regionaalspraak Schuul.
Sprakencharta - wat is dat?
Bi "Wi snackt Platt" höört wi nochmal rin in de Debatt un stellt noch mal dat een oder anner dorvun rut, wat dor so in'n Bunnsdag to seggt worrn is. Vele vun de Politikers, de sik to dat Thema to ütert hebbt, de hebbt ok op Platt snackt. Un wi geevt kloor ok noch mal en Anter op de Fraag, wat dat egens is, de Sprakencharta, üm de dat dor güng. Dat Nedderdüütschsekretariat un de Bunnsraat för Nedderdüütsch hebbt dorto en Verkloorfilm to maakt, den een sik hier (YouTube) ankieken kann.
"Dat Füerschipp"
Bavento kiekt wi in uns Sennen op dat ne'e Stück in't Ohnsorg-Theater: "Dat Füerschipp". Dat Schauspeel na de Vertellen vun Siegfried Lenz hett dor düsse Daag Premieer fiert. De bekannte noorddüütsche Klassiker is vör över 60 Johr schreven worrn un weer för vele Lüüd al Leesstoff in'e School. Speelt warrt op Platt- un op Hoochdüütsch. Is en Stück, wo dat veel wat hen un her gahn deit un wat spannen blifft bet to'n Sluss. Ankieken kann een sik dat ne'e Stück in't Ohnsorg-Theater "Dat Füerschipp" noch bet na'n 13. April hen.
De Leder in uns Sennen:
Otto Groote Ensemble - Straat nah Westen
Wiebke Colmorgen & Hardy Kayser - Willnix, kannix & weetnix
Ina Müller - Mama
Lui & Fiete - Rollin' Home
Nick, Yared & Floy feat. The Charchullas - These boys must be free
Moderatschoon: Jürgen Fitschen
Schlagwörter zu diesem Artikel
Plattdeutsch
