Wat doon bi een Schrievblockade?
Mehr as annerthalf Duusend Autoren vun wiet un siet maken jedet Jahr bi' "Vertell doch mal" mit. Dor sünd welke dorbi, de den "Dreih" ruut hebbt un nich blots eenmal wunnen hebbt. Man, dat schaffen jedet Jahr ok Deelnehmer op de Sieger-Bühn un in't "Vertell doch mal"-Book, wat vördem noch nie nich' mitmakt hebbt.
Man, för beide Gruppen vun Autoren gifft dat oft een grotet gemeensamet Problem: Nämli bang to ween för dat grote witte Blatt Papeer, oder den leerdigen Bildschirm. Düt Geföhl vun "Echo in Kopp", dat hebbt hüüt vun düssen Momang an - ok wedder ganz veele Minschen in Norden. Uns Autorin Ines Barber hett dor een paar Tipps praat, för all, de een Anfang vu'n Geschicht söken.
De Arbeitsplatz
Maak di dat kommodig an Schrievdisch, allns beten schier - Gedöns wech, klore Kante, Pott Koffi oder Tee dorto, villicht jo sogor' n Keks. Un dörchaten. Ik kann di verspreken, wenn't erstmol löppt, denn löppt dat.
Nich' Bang ween för den Anfang
Aber klor: De eersten Sätz. De Anfang. Okay, is 'n beten vigeliensch. Schriev wat knackiget. Wat, wat de Tohörer neegierig makt, toon Bispeel sowat as: Ik keek in't Köhlschapp. Nee ok, dor, neven den Gouda, dor leeg wohrhaftig mien Huusdörslötel, ieskolt. Un merrn inne Mettwuss steek een Zeddel. Dor op stunn ... Tjo, de erst Satz, de Anfang, de mutt smecken. Zack! Nu kannst loslegen. Villicht dinkst di eenfach twee, dree vun solk snaaksche eerst Sätz ut, un denn …
De Rechtschreibung
Gah mi af! Ne, jo, gifft natürlich Regeln. Man bi "Vertell doch mol" sitts nich oppe Schoolbank. Dien Story un woans du vertellst, dat is wichtig: spannend, besünners, mit Geföhl, wat di in Kopp kümmt. Uns Experten korrigeert de dullsten Kapriolen, also, maak du di keen grote Kopp ümme Schrievwies. Sünst dreihst dörch. Un denn schimmelst inne Schrievblockaad.
Toon Sluss
Ach jo, ganz wichtig: Lees di dien Geschicht unbeding nomol luud unlangsom sülvst vör. Is se doch to lang? Dat’s gefährlich, denn so flüggst du rut, eendoont wo klasse dien Vertelln is. Dat’s denn echt mol kontraproduktiv. Also, kiek di de Regeln för den "Vertell doch mal"-Wettbewerb an un check dat.
Schlagwörter zu diesem Artikel
Plattdeutsch
