Gerrit vertellt mal: Miene erste Gitarr
"Wat för'n Dag" - das Thema unseres plattdeutschen Schreibwettbewerbs "Vertell doch mal" hat auch unsere Autoren aus der Plattdeutsch-Redaktion inspiriert. Mit ihren Erzählungen möchten sie andere für die plattdeutsche Sprache und den Wettbewerb begeistern. Wir freuen uns auf Ihre Zusendung.
von Gerrit Hoss
"Pling, pling", so klingt se. Mien eerste groote Leev. Weer överall mit. Teltlager, Schoolutfloog, de eerste Optritt mit bannig Lampenfever, de eerste richtig groote Bühn mit 10.000 Lüüd un noch mehr Lampenfever un de lüttste Habenspelunke, wo mi blots en paar Suupbüüt tohöört hebbt.
So fung dat an
Wat för en Dag! Domols, as ik ehr dat eerste Mal in'ne Hannen kregen heff. Un dat ward ik nienich vergeten. As lütten Butscher mit mien Öllern in'n Gitarrenladen. En Barg an Instrumenten, un ik heff so meist 20 verscheeden Gitarren anspeelt. Man so richtig hebbt se sik al nich anföhlt. Man denn hett de Verkööper noch een ut sien Schaufinster kraamt. Dor weer nichmal en Pries op to finnen, wiel dat se woll nicht o verkööpen weer.
De Gitarr is de grote Leef
Man denn heff ik ehr anspeelt un furts wusst: "De is blots för mi buut worrn." Un ik weer hen un wech. Wullt nix anners mehr hebben. Blots düsse Gitarr. Villicht weer ik ün düssen Momang dat eerste Mal in mien Leven so richtig verleevt. In een Instrument.Tja, un nu 25 Johr laater steiht se immer noch hier un ik kann seggen: Du, mien Gitarr is de eenzgste, de ümmer an mien Siet weer. Wenn ik fröhlich weer in Dur un ok de en oder anner Moll Akkord över de Johren. De eerste Uttoch na München. Ok dor weer se mit dorbi. Eenmal vun ganz boven in Düütschland na ganz ünnen. Ik in mien lütten rooden Ford Fiesta un op'n Bifohrersitz: Klaar, de Gitarr, de ik domols an düssen Dag in't Schaufinster dat eerste mal sehen hebb.
Welke Dag geiht ji nich ut'n Kopp?
Nu is de Lack langsam af, man so ganz fuchtig is ehr Speeler ja ok nich mehr. Man jedeen mal, wenn ik ehr ut'n Stänner nehm, kaamt so veele Biller ut oole Tieden. Denn bün ik wedder kott de lütte Butjer, de düssen eenen Dag mit sien Öllern in'n Gitarrenladen steiht un dorvun dröhmt eenmal op ganz groote Bühnen to speelen. Heest Du ok so en Dag, de Di nich mehr ut'n Kopp geiht? Denn vertell doch mal - hier bi unsern Schrieverswettstriet.
Schlagwörter zu diesem Artikel
Plattdeutsch
