Platt leevt: Mit de Rettungshundestaffel in't Gelände
Över 20 Hunnen hebbt sik in't Pfadfinderlager in Tydal mitsamt ehre Fruuchen und Herrchen infunnen. Justso dorbi is de Rettungshundestaffel vun Sylt. Dor hört ok Nieke to. Se is een ungarischen Vizsla und ward ton Rettungshund utbilt. Bi de erste Öven gaiht dat dorüm, een Person antoloopen, de op'n Footborrn liggt und denn düchtig to bellen. So schall den Hundeführer wiest warrn: "Hey, kumm gau her, düsse Minsch bruukt Hülp!" Bi den ersten Versöök löppt Nieke aver no de verkehrte Person.
Dranblieven is de Devise
Bi'n tweeten Versöök klappt dat wi in't Billerbook. Nieke peest los und bellt so luud, dat man dat dörch 'n ganzen Woold hören kann. Gert grient "Dat is perfekt, ja fein!" und striegelt Nieke över ehr karamellbruunes kottes Fell. No 'n kotte Paus ward dat n beeten wat swoorer. Dütmol ward twee Personen versteeken, ganz verstreut achter Gestrüpp und Büscher. De erste Person find Nieke furz, bellt aver nich.
Hund und Hundeführer sünd een Team
Herrchen Gert gifft ehr nochmaal een Teeken und Nieke bellt los. He langt er 'n Stück Knackwust hin und giff dat Kommando för de tweete hölploose Person. Nieke maakt sik op de Strümp und blots een poor Sekunnen loter hört man se düchtig bellen. Allens richtig mookt. Nieke kann bald to Prüfung.
Öven nimmt veel Tied in Anspruch
Jümmer middeweeken und sünnavends gaiht Gert mit sien Nieke ton Rettungshundetraining. Tweemol de Week tosätzlich to Hundeschool. Und jeden Daag ward Rad fohrt. "Mehr Tied mit'n Hund as mit de Fruu, dat is so", seggt Gert. Liekers, het weet woför he dat daiht. Bald is Nieke een vun 2.000 Rettungshunnen in Düütschland und de beiden könnt as Team viellicht sogar mol een Menschen in Not retten.
Schlagwörter zu diesem Artikel
Plattdeutsch
