Priesvergaav Dat grote P an Renate Poggensee un Marianne Ehlers

Siet 2003 warrt dat grote P all twee Johr vergeven an Minschen, de sik sünnerlich verdeent maakt üm de Pleeg vun de plattdüütsche Spraak. De Süstern Renate Poggensee un Marianne Ehlers ut dat Dörp Welt op Eiderstedt höört definitiv dorto, see Laudator un vörigen Leidsmann vun dat Zentrum för Plattdüütsch in Leck, Ingwer Oldsen: „De doren Deerns, de sünd överall, wo wat Plattdüütschs is, un dat Schlimme is, de köönt ja ok noch wat. Un wenn man dat so seggt, is dat dat hööchste noordfriesische Lob, dat man sik vörstellen kann.“

So sett Marianne Ehlers sik siet Johrteihnten as Liddmaat vun den plattdüütschen Raat polietsch in för de Regionalspraak. Süster Renate Poggensee is Pädagoogsche und hett in’n Kinnergorrn de Spraak an lütte Sleswig-Holsteners randragen. Tohopen hebbt se Foortbillens geven för School un Kinnergorrn un dorbi ok veel Material för de nedderdüütsche Pädagogik tohoopstellt. Sünnerlich geern dinkt Renate an de direkte Arbeit mit Kinner. „Wi hebbt manchmal Kinner dortwüschen hatt, de villicht nich dat so ganz eenfach harrn, un mi hett dat ümmer so freut, wenn wi de gut mit langskregen hebbt, dat de an`t Enn vun so’n Wuchenenn ümmer ganz fröhli weren un gut mitmaken kunnen.“

Dat Duo Ehlers un Poggensee - Dreger vun dat grote P 2024 - togliek dat 30. Jubiläumsjohr vun dat Zentrum för Nedderdüütsch.

„Dat weer jetzt nich ursprünglich so vörsehn, dat wi bet to’t Jubiläum töövt hebbt mit de beiden, dat hett sik irgendwie so fügt, un de Schullen dat gaz nootwennig mal hebben. Se sünd de beiden ok, de uns an’n dichtesten ok in düsse 30 Johr as Fortbildnerinnen mit begleitet hebben.“ Seggt de aktuelle Zentrumsleidersch Gesa Retzlaff in beste Fierluun. „För de Lütten“ so heet een vun de Wiederbillensprogrammen vun dat Lecker Plattzentrum, in dat Ehlers un Poggensee ehr Weten wiedergeevt. Basisarbeit för de Tokumst vun de Regionalspraak - un dat nu priesbelohnt.