Waterstoff in de Ort vun gröne Ammoniak: Sowat bruukt Düütschland, heet dat, üm för’t Klima keen Schaden mehr to maken. Düsse Waterstoff schall in Tokunft mit’t Schipp vun Kanada na Hamborg bröcht warden. Dat hett Viz-Kanzler Robert Habeck hier in de Stadt güstern mit Vertreders ut Kanada so afsnackt. De Wirtschapp-Ministersch vun Hamborg Melanie Leonhard seggt, dat is’n wichtige Etapp un hölpt, dat Hamborg op de Landkort to sehn is, as wichtig Drehkrüüz för dat Inföhren vun nawassen Engerie. In dree Johr schall dat losgahn mit dat Waterstoff-Utföhrn vun Kanada.
Ween en Strohdackhuus brennt, is dat jümmers’n groden Füerwehrinsatz. Dat is ok güstern in Neefeld so west. Hunnertteihn Füerwehrlüüd sünd siet güstern Avend dor an’t Hölpen west. Dat Utkriegen vun dat Füer weer nich so enfach. De Füerwehr müsste ok Water ut dicht bi liggen Löschwater-Dieken afpumpen. Een Fomilie, wo veer Lüüd mit tohüürt, kunn sik ut dat Huus redden, ahn dat se to Schaden kamen is. In dat Huus kann’n opstunns nich mehr in wahnen. Woso dat to brennen anfungen hett, weet wi noch nich.
Op de een Hand is Düütschland en rieket Land, op de anner Hand gifft dat vele arme Minschen. Dat bekrittelt nu de Europaraat un verlangt vun de Bunnsregeren, dat se mit mehr Knööv un Kraasch gegen Armoot angeiht. As Bispeele seggt de Europaraat, dat dat in Düütschland nich noog Wahnungen gifft un jümmer mehr Minschen ahn Dack över den Kopp leevt. Doröver rut bekrittelt se, dat de Regeren in de Corona-Pandemie faken översehn hett, wat Kinners un jung Lüüd bruukt.
Se hebbt na good een Maand wedder mitenanner telefonert: US-Presedent Joe Biden un de Ministerpresedent vun Israel Benjamin Netanjahu. Dat Snacken hett sik dorüm dreiht, wat Israel an Bodenoffensiv in de Stadt Rafah in den Gazastriepen plaant. Biden seggt, düsse Plaan is verkehrt, un he makt sik dull Sorgen. Netanjahu will nu een Aforden na Washington schicken. Vertreders vun Armee, Geheemdeenste un Facklüüd för Hölpprojekte wüllt dor över dat snacken, wat viellicht annerwegens noch moeglich weer.
För dat nee’e Register för Organspenn gifft dat ornlich Gegenwind. Siet güstern koent sik Minschen, de sik dorför interessert, in’t Nett för düsse List anmellen. Man de Maatschapp Pro Transplant bekrittelt, dat de Hürden doför temlich hooch sünd. So bruukt en de Internetfuntschoon bi sien Personaalutwies, dorto en App un noch en Instrument to’n Kortenlesen. Vunaf Oktobermaand schall dat Verfohren woll eenfacher warden.
Wenn Straten ümboogt warrt, gifft dat jümmer öfter Minschen, de dat bekrittelt. Ok nu bi de Frohmestraat in Schnelsen an den A7-Deckel. Vun dat Bezirkamt gifft dat twee Vörsleeg: Entweder, dat’n blots noch twintig Kilometer in’e Stunn föhrn dörf un dat dat veerdig Perßent weniger Parkareale gifft. Oder dat en eegen Striepen op de Straat för Radfohrers kümmt un dree Vierdel vun de Parkplätz streken warrt. SPD, CDU un FDP wüllt nu, dat noch anner Varianten ankeken warrt, de se gor nich mehr op’n Plaan hebbt. Doröver rut schüllt Anwahners na ehr Menen fraagt warden, seggt de FDP.
Wi hebbt vundag mal Wulkenwark, mal Sünnenschien, un na’n Avend hen kann’t ok beten Regen oder Sprüttenregen geven. Mehrstendeels blifft dat man dröög. De Temperatur kladdert bet dörteihn Graad. Opstunns hebbt wi op Finkwarder eerst veer Graad. De Wind dorto kümmt lau bet middeldull ut Süüdoost. Un so geiht dat wieder: Morgen to Fröhjohrsanfang warrt dat ok fröhjohrshaftig, woll veel Wulken un beten Regen, man ok hier un dor Sünnenschien, un dat warrt warmer, bet sößteihn Graad.