Hamborgs Weertschopsenatersch Melanie Leonhard geiht dorvun ut, dat de Senat in de tokamen Weken en Entscheden över de ne'e Köhlbrandbrüch drepen deit. Güstern hebbt se de Afstimmen verschaven, wieldat de gröön föhrte Ümweltbehöörd korthannig noch Bedenken harr. Dat womit se de Köhlbrandbrüch ersetten warrt, dat warrt en Johrhunnert-Bowark, sä Leonhard in't Hamborg-Journal vun't NDR Fernsehen. Dor kunn dat al mal op de letzten Meters en beten ruckeln. As Retourkutsch vun de Grönen gegen de SPD süht se dat Hentrecken nich an.
Hamborgs Autobahnbrüchen sünd in en teemlich maroden Tostand. Twee Drüttel vun jem süllt nu nee op Schick bröcht warrn. Dat is bi en Daten-Ünnersöken vun'n NDR rutsuert. Dat Sorgenkind vun de Autobahn GmbH in Hamborg is de Norderelvbrüch vun de A1. De warrt in veer Johr ersett. Noch is se seker un warrt jümmer wedder ünnersöcht. De Daten wiest, dat se 63 Perzent vun de Brüchen in Hamborg utbetern oder monderniseren mööt.
Goot de Halve vun de Hamborgers seggt "Ne" to't fre'e Verköpen un verlöövten Konsum vun Cannabis. Dat is bi en Ümfraag vun #ndrfragt rutkamen. De Grund, dat so veel dorgegen sünd: Minnerjohrige wöörn so lichter an de Droog rankamen un de Gefohr, dat se afhängig warrt, weer denn grötter. Minschen de ünner 30 Johr oolt sünd, finnt dat mehrstendeels goot, dat Cannabis nu legal warrt. Wat dor bi #NDRfragt rutkamen is, dat is nu nich repräsentativ, man dat seggt al mal wat ut. Mehr Informatschonen dorto kriegt Ji in de NDR Hamborg App.
In de US-Stadt Baltimore hebbt de Reddenslüüd na dat Instötten vun de Brüch nu ophollen, noch Minschen to söken, de dat Unglück överleevt hebbt. Wat de Küstenwach seggt, sünd de söss Minschen, de dor noch misst warrt, woll doot. Wegen dat kole Water glöövt se nich mehr, dat se dor noch jichtenseen levend finnen köönt. De Oppers süllt Boarbeiders ween, de op de Brüch Slaglöcker repareert hebbt. Twee vun jem kunnen se güstern noch redden.
To't Enn vun'n Januar hett dat Sozialkoophuus in Horborg dicht maken musst. - So as 30 anner sozialen Projekten in Hamborg ok. Man nu hett dat wedder open maakt. Dat heet nu "fairedelt" un hett ok en ne'et Kunzept. Dor kann jedeen nahollern inhalen gahn. För de Lüüd, de dor arbeit löppt dat över en Gesett, wat jem en Schangs geven sall, wedder an'n Arbeitsmarkt deeltohebben. Vörher weer dat Sozialkoophuus in Horborg en Trainigsakschoon vun't Jobcenter.
De Füerwehr Hamborg is fröh an'n Morgen to'n Wahnungsbrand in Winterhuud utrückt. Dat Füer weer in'n drütten Stock vun en 5-stöckig Mehrfamilienhuus in de Straat Jacobistift. Mehre Lüüd hebbt se in Sekerheit bröcht. Een Minschen mussen se mit Verdacht op Rookgasvergiften na't Krankenhuus henbringen. De Füerwehr weer mit 50 Lüüd dor in'n Insatz. Woans dat to den Brand kamen is, dat weet wi noch nich.
De düütsche Football-Natschonaalmannschop hett ok den tweten groten EM-Test bestahn. Dat Team vun Bunnstrainer Julian Nagelsmann hett gegen de Nedderlannen mit en 2:1 wunnen. Dat Tor to'n Sieg hett Niclas Füllkrug in de 85. Minuut schaten. Vörher hett Maximilian Mittelstädt för Düütschland drapen. In de EM-Playoffs hebbt sik an'n Avend de Ukrain, Polen un Georgien dörchsett. Dormit is dat Feld mit de Deelnehmers vun de Football-Europamesterschop nu kumplett.