Mund, Nees un Steern sünd todeckt, blots de Oogen sünd free – op düsse Oort dat Gesicht to verhüllen, dat is an Hamborgs Scholen in Tokumst nu offizjell verbaden. Dat hett de Börgerschop nu beslaten, op Andrag vun‘e Regerensfrakschonen vun SPD un de Grönen. In’e Börgerschop hebbt ok CDU un AfD de ne‘en Regeln mitdragen. De Linke is nich dorför ween. Bi de SPD hebbt se seggt, dat weer wichtig, wenn man mit’nanner snacken dee, dat een ok dat Gesicht vun den Minschen gegenöver sehn kunn.
Politikerlüüd op’e ganze Welt sünd verbaast na den Anslag op den Regerensböversten vun’e Slowakei Robert Fico. Bunnskanzler Olaf Scholz sä, de Saak weer nich uttohollen un US-Präsident Joe Biden snack vun en schreckliche Gewaltsaak. De Regerensböverste vun’e Slowakei is anschaten worrn, na’t Krankenhuus henkamen un dor denn nootopereert worrn un is nu wedder bi Verstand. Wat dat heet, schall dat een 71 Johr ole Keerl ween hebben, de schaten hett un de en polietsch Motiv harr. So seggt dat tominnst de Binnenminister vun’e Slowakei.
Gewalt gegen Politikerlüüd – so welk Vörfäll hett dat ok in Düütschland ümmer wedder geven. Un vundaag nu snackt de Bunnsdag över Angreep op Lüüd, de bi de Wahl hölpen doot. In Hamborg is toletzt de SPD-Topkandidat för Hamm bi dat Opstellen vun Wahl-Plakaten to Schaden kamen. Unbekannte Lüüd harrn woll en Rasierkling op’e Rücksiet vun en Plakat fastmaakt. As de Politiker Olcay Aydik de Tafel, de af ween is, wedder opstellen wull, harr he bums in’e Kling rinfaat. De Staatsschuul geiht de Saak nu op’n Grund.
Quantencomputers – düsse Reekners köönt en groten Barg Daten veel wat gauer verarbeiden as normale Computers dat köönt. Un de Hamborger Senaat gifft düssen Weg nu Stütt. Denn de Senaat stellt in’e tokamen Johren rund 34 Millionen Euro praat. Dat Geld is vör allen Dingen dorför dacht, üm Fachlüüd uttobillen. De eerste Quantencomputer, de för de Industrie wat döggt, de schall Enn vun’n Maimaand bi de Firma NXP an’e Beiersdörpstraat in Eimsbüddel vörstellt warrn. Dor warrt denn ok Bunnskanzler Olaf Scholz mit bi ween.
Se hebbt jüst veel wat dormit to doon, de Lizenz för de Bunnsliga to kriegen. Man güstern nu müssen de Handballers vun’n HSV Hamborg ok op dat Speelfeld ran. Aver gegen Flensburg-Handewitt hebbt se mit 30 to 41 verloren. Beter lööp dat för den Hamborger Tennisprofi Alexander Zverev: He is bi dat Masters-Turnier in Rom nu na’t Halffinaal henkamen. Vöraf harr he mit twee Sätz gegen Taylor Fritz ut’e USA wunnen.
De Dag vundaag föhlt sik mit sössuntwintig Graad ok wedder veel wat na Sommer an. Opstunns sünd dat achtteihn Graad in Dulsbarg. Bavento schient uns de Sünn vundaag veel wat op’n Kopp. Namiddags sünd denn ok ’n poor mehr Wulken mit bi, de denn later ok mehr warrn doot. Liekers aver blifft dat dröög. Man de Wind is twüschendör düchtig wat an’t Pusten. Un morgen warrt dat alltohoop mit fiefuntwintig Graad ok noch mal en feinen Dag, liekers de Sünn denn villicht nich ganz so veel schienen mag as vundaag.
Woans geiht dat hier bi uns in Hamborg wieder mit den Elvtower? Op düsse Fraag geev dat güstern in’n Huushooltsutschuss vun’e Börgerschop Antwoorden. Hamborg hett för den Rohbo dat Recht anmellt, dat Grundstück trüchköpen to könen. Dorför hett de Stadt nu negen Maand lang Tiet. Stadtentwickelnssenatersch Karen Pein sä, dat düsse Schritt nödig ween is, wiel dat de Stadt bi dat Verkoopsverfohren, wat totiets lopen deit, nich mitsnacken dröff. Un blots so op düssen Weg kann Hamborg denn unpassliche Investoren verhinnern.