Moin!
Hier is Helge Albrecht ut Kiel un ik segg vörweg: Veelen Dank!
Wi hebben uk düt Johr wedder een Barg an Insennen kregen to uns Schrievwettstriet "
Vertell doch mal". De hele Saak löppt jo blots, wenn ju mitmaken doon - un dat hebben ju. Middewiel hett sik de Jury vör en eerste Runn tohoopsett, de Vertellen sorteert un entscheed. De 25 Winners, de ehr Geschichten in't Book rutkamen warrt, hebben jüst en Naricht kreegen. Noch nich rut is, wer denn uk noch een Geldpries afrüümt. Dat kümmt erst bi uns Vertell-doch-mal-Gala rut. Wenn ju dorbi ween wüllt:
An 22. Juni geiht dat af in't Ohnsorg Theater!
Wat uk richti afgeiht: Werner-Erfinner "
Brösel" is 75 worrn un klütert ümmer noch flietig an sien Comics. För uns Online-Format "Mit Drift!" hebben wi Brösel tohuus besöcht. Twüschen Teekendisch, ole Maschins un Teeketelyoga warrt nich blots Bölkstoff sapen - wi lehrn uk en ganz anner Siet vun em kennen.
In Hannover hett Yared Dibaba de plattdüütsche Tina Turner to Besöök hat.
Stephanie Steup leggt op de Bühn düchtig los mit de Welthits vun Queen of Rock'n'Roll. De Texten hett se mal op Plattdüütsch översett, mal kumplett nieg schreven. Wie se dorto kamen is, köönt ju hören in de Podcast Platt Schnack Mucke.
Un nu an Wuchenenn kamen wi mit en niege Sennen vun "
De Noorden op Platt" rut. Vanessa Kossen geiht dor ünner annern mit Hölp vun Frank Jakobs de ostfreeschen Traditschonen to Ostern op'n Grund. Löppt Sünnavend, Klock 11:30, in't NDR Fernsehen un dorna in de Mediathek.
Wenn ju keen Fernsehen, sunnern lever Theater kieken wüllt, is dat niege
Ohnsorg-Stück "Oddos See - eine irre Fahrt" villicht wat. En ole Saga kumplett verdreiht na Norddüütschland hoolt - lohnt sik, meent mien Kolleeg Jan Wulf.
Allens, wat wi op Plattdüütsch bi'n NDR maken, finnt ju uk op
ndr.de/platt
Veele Gröten vun jun Plattschnackerinnen und Plattschnackers vun'n NDR!
Ersmol
27. März 2025
