Wi snackt platt
Sonntag, 08. Januar 2023, 08:30 bis
09:00 Uhr
"Tohuus" - das kann vieles sein
Botschafter un Moderator Yared Dibaba freit sik op Joon Geschichten!
Bi "Wi snackt Platt" geiht dat dütmal üm de plattdüütsche Schrievakschoon "Vertell doch mal". Wi vertellt Jo, wat düt Johr dat Thema vun „Vertell doch mal“ is un wat dat to winnen gifft!
"Tohuus" - Wi söökt de beste Kortgeschicht op Platt
Nu löppt se wedder: uns plattdüütsche Schrievakschoon “Vertell doch mal!”. De NDR söcht tohoop mit Radio Bremen un dat Ohnsorg-Theater de besten Kortgeschichten op Platt to't Thema "Tohuus" – un twors schreven vun Jo: uns Tohörers! Noch bet to’n 28. Februar hebbt Ji Tiet, uns Joon Kortgeschicht totoschicken - un ok dütmal hebbt Ji wedder de Chance, tohooprekent mehr as 5000 Euro to winnen.
Yared Dibaba is "Vertell doch mal"-Botschafter
Ina Müller un de Band Santiano weern uns Vertell doch mal-Botschafters in’e verleden twee Johr, un ok düt Johr hebbt wi wedder prominente Ünnerstütten vun een Plattsnacker, den Ji seker all kennt: Yared Dibaba! NDR Platt-Reporter Helge Albrecht hett den Moderator, Sänger un Plattsnacker bi en vun siene Optritten drapen.
Twee lütte Geschichten as "Inpiratschoon"
"Tohuus", so heet en Geschicht, de uns Hamborger "Hör mal'n beten to"-Autorsch Carina Dawert mal opschreven un vertellt hett. Dorto höört Ji bi "Wi snackt Platt" ok noch de Geschicht "Wedder na Huus" vun den unvergeten Hamborger Schauspeler, Intendanten un Synchron-Spreker Friedrich Schütter.
Plattdüütsch Hörspeel: De Hillige Jens-Dieter
Wat passeert egens mit mi, wenn ik mal doot bün? Dat is een Fraag, över de woll vele uns ok al mal nadacht hebbt. De een meent, dat denn gor nix mehr is, de annern glöövt, dat dat Leven na den Doot noch wiedergahn deit – blots anners – in’n Heven villicht. Wat ok interessant is, dat is de Fraag, wat denn dor in Heven egens op uns tokamen deit. Wat maakt wi dor de hele Tiet? Nix? De ganze Tiet jubileern un Leder singen – oder: villicht en Utbillen to’n Schutzengel maken?
Op düsse Idee, also de mit de Utbillen to’n Schutzengel, dor is de Schrieversmann Wolfgang Gerth ut Wilhelmshoben op kamen – un he hett dorut en plattdüütsch Hörspeel maakt: „De hillige Jens-Dieter“, so heet dat Stück un hören köönt Ji dat bi NDR 90,3 an’n Middewekenavend. Bi "Wi snackt Platt" vertellt Jo Ilka Brüggemann mehr över dat Stück.
Moderatschoon: Jan Wulf
Schlagwörter zu diesem Artikel
Plattdeutsch
