Amtsstohl warrd free
De Baas vun den Bezirk Hamborg-Mitte, Markus Schreiber, wüll hüüt sien Amt opgeven. Dat hebbt SPD-Lüüd to NDR 90,3 seggt. Hüüt Nohmeddag schall dat wohl offiziell bekannt geven warrn. De Grund dorför dat Schreiber geiht, is de Dood vun de ölven Johr ole Chantal ut Willemsborg./Stand: 10.02.12, Klock:8:30
Vergnögen op Ies
Hüüt Meddag geiht dat Alster-Iesvergnögen los. Bummelig een Million Minschen warrd wohl bet Sünndag dorhen gohn. An de Alsterkant stoht rund 60 Buden mit Eten un Drinken. NDR 90,3 un dat Hamborg Journal sünd an de Westensiet bi dat Cliff mit vun de Partie un överdrägt direkt. Dat Ies op de Butenalster is nu rund 20 Zentimeter dick./Stand: 10.02.12, Klock:8:30
Griechenland ünner de Luup
De Eurogrupp hett Griechenland een Tietpunkt vörgeven, wo se wiesen mööt, dat se ok op de Spoorbrems drücken doot. De Baas vun de Eurogrupp, Jean-Claude Juncker, hett noch en Dropen för den tokomen Mittwoch ankünnigt. Denn schüllt nipp un nau Vörslääg to Disch, mit de Athen noch beter ünner de Luup nohmen warrn kann./Stand: 10.02.12, Klock:8:30
Stüern bi`n Wickel
In Berlin wüll de Bunnesroot hüüt över de Ploons to`n Stüernsenken beroden. Ünner annern schall de Grundfreebedrag ropsett warrn. Dormit wüllt Union un FDP de Stüerlast üm söß Millarden Euro doolsetten. De Koalitschoon bruukt dörför dat "Ja" vun den Bunnesroot./Stand: 10.02.12, Klock:8:30
Zentrum dicht
In Hamborg warrd to`n eersten Mol en Kunnenzentrum wegen to wenig Personool dicht mookt. De Bezirksamtsleiter vun Eimsbüddel, Torsten Sevecke, wüll an`n Enn vun März dat Inwohneramt Stellingen dichtmoken. De Oppositschoonsparteien CDU un "Die Linke" sünd al forts op de Barrikoden gohn./Stand: 10.02.12, Klock:8:30
Fehler togeven
De fröhere Radrennföhrer Jan Ullrich hett togeven, dat he Kuntakt to den spoonschen Dokter Eufe-Miano Fuentes harr. Ullrich hett op sien Internetsiet schreven, dat dat en groten Fehler weer. He hett ober nich direkt togeven, dat he Medikamenten för en betere Leistung nohmen hett. De 38 Johr ole Radrennföhrer is gistern wegen Doping veroordeelt worden./Stand: 10.02.12, Klock:8:30
Dat Wedder
Lockere Wulken un Sünn wesselt sik an Heben bi 2 Grood Minus af. Opstunns sünd in Lohbrüch 5 Grood Minus. De Wind kümmt lau vun de Oostenkant. Dree Stünnen lang schall de Sünn schienen un de Chance op Snee liggt bi 10 Perzent. Morgen treckt dat en beten dichter, ansünsten blifft dat so as hüüt. Ok Sünndag gifft dat Wulken, dorto Snee bi Null Grood./Stand: 10.02.12, Klock:8:30
Börgerschops-Debatt
In de Hamborgischer Börgerschop hebbt güstern all Oppositschoons- Afordneten wegen den Dood vun de ölbenjohrig Chantal föddert, dat personell wat passeren mutt. Meent is dormit, dat de Bezirksamtsboos vun Hamborg-Mitte, Markus Schreiber, trüchtreden schall. Börgermeister Olaf Scholz hett sik den Striet anhöört, ober dor sülvst nich ingrepen. Man Sozioolsenoter Detlef Scheele hett ´n Reform vun dat Hölpssystem för junge Lüüd ankünnigt.
Stand: 9. Februar 2012, Klock halbig negen
Plattdüütsch: Hartmut Cyriacks
Alsteriesvergnöger
Morgen Middag geiht dat Alsteriesvergnögen los. Ant Över vun de Butenalster warrt al Boden opstellt. NDR 90,3 un Hamborg Journal sünd dor ok mit bi - mit Musik un Live-Sennungen vun´t Alster-Cliff. Güstern hett de Ümwelt-Behöörd mellt, dat dat Ies 15 bet 22 Zentimeter dick is - un dat langt.
Stand: 9. Februar 2012, Klock halbig negen
Düer Heizöl
Dat Heizöl is totiets in Hamborg wedder so düer as al lang nich mehr. Öber 90 Euro mutt ´n nu för 100 Liter berappen. Vun den Minerool-Öl-Wirtschops-Verband is to hören, dat de Pries dat letzt Mol vör veer Johr so hooch ween is. Se seggt, dat kümmt dorvun, dat dat so koolt is. Un dorüm gifft dat Probleme bi´t Hen un Her Fohren vun dat Öl. Opto speelt dor ok de Politik mit rin. So to´n Bispill de Atom-Striet mit ´n Iran.
Stand: 9. Februar 2012, Klock halbig negen
