Archiv

Norichten op Platt

Ut Hamborg und de wiede Welt von moondaags bit sünnovends Klock 9.30 - die aktuellen Nachrichten auf Plattdeutsch hören Sie von Montag bis Freitag um 9.30 Uhr bei NDR 90,3

Trump in't Amt

Dag een na den Machtwessel in de USA:
US-Präsident Donald Trump hett as sien erste Amtsdaat erste Schritte för dat Trüchnehmen vun Obamacare in Gang sett. Dat is de Sundheitsreform vun Barack Obama. Bi sien Antrittsreed hett Trump mit de Wöör "Amerika toerst" kloor maakt, wohen sien politischen Weg geiht. Ook vundaag warrd wedder gegen Trump protestert. //Stand 21.01.2017 Klock 9:30

Afschuven na Afghanistan

Binnensenater Andy Grote vun de SPD blifft dorbi:
Hamborg schuuvt ook in Tokunft Flüchtlinge in Gruppen af na Afghanistan. Bi'n Binnenutschuss vun de Börgerschap sä Grote, dat drippt Straaftäter un Mannslüüd, de alleen sünd. De greune Koalitionsspartner maakt dor gor nich geern mit. De LINKE höllt nix vun dat Afschuven na Afghanistan. //Stand 21.01.2017 Klock 9:30

Italien: Busunglück un Lawine

In Italien geev dat in de Neugde vun Verona en swoor Busunglück. Dorbi sünd tominnst sössteihn Lüüd dootbleven. Bummelig veertig Minschen kemen to Schaden. In den Bus seten Schöler vun en Budapester Gymnasium.
Na dat Lawinenunglück in de Abruzzen hebbt se noch mehr Lüüd, de dat överleevt hebbt ut de Trümmer vun't Hotel trocken. En Eerbevern harr de Lawine Middeweken utlööst //Stand 21.01.2017 Klock 9:30

Törkei

Mehr Macht för den törk'schen Staatspräsidenten: Dat Parlament in Ankara hett nu Jo to dat plaante Präsidialsystem seggt. Meuglich weer dat dörch en Pakt vun de AKP vun Staatspräsident Recep Tayip Erdogan un de ultrarechte MHP. Dat törk'sche Volk entscheedt denn in en Afstimmen över de Verfatensreform. De Oppositionsparten sünd bang, dor suert en Een-Mann-Herrschaft rut, de wat vun Diktatur hett. //Stand 21.01.2017 Klock 9:30

Havencity

In'n Oosten vun de Havencity süllt se op lange Sicht veer vun teihn Wahnungen staatlich fördern. Wat de Havencity GmbH seggt, plaant se en Hüer vun söss Euro dörtig den Quadraatmeter. Un denn plaant se ook noch an'n Baakenhaven bet to veerhunnert elektrisch bedreven Leihautos. //Stand 21.01.2017 Klock 9:30

Football

Dat erste Bunnsliga-Speel för den HSV na de Winterpuus steiht an. De Hamborger speelt bi'n VfL Wolfsborg.
Güstern hett de FC Bayern den SC Freiborg mit'n 2 to 1 na Bett schickt. //Stand 21.01.2017 Klock 9:30

Exakt un kumpakt - dat Wedder för uns in Hamborg

Dat Wedder för uns in Hamborg wiest sik vundaag ganz in gries. Vele Wulken, de jemehr Water nich jümmer hollen köönt. Denn drieselt dat jümmer mal so´n beten un de Temperaturen kladdert op bet to fief Graad rop. Opstunns meet wi in Wandsbeek noch twee Graad.
Morgen geiht de Nevel gor nich geern weg. Sünd wi em aver erstmal los, denn pliert ook mal de Sünn dörch de Wulken. Warm warrd dat aver al lang noch nich. De Temperaturen schafft morgen nich mehr as een lierlütten Graad. // Stand 21.01.2017 Klock 9:30

Bomb in'n Horborger Binnenhaven warrt unschädlich maakt

Bi den Horborger Binnenhaven maakt se nu de Bomb unschädlich. Dat is nu al de twete in Hamborg siet güstern Namiddag. Grote Delen vun den Haven hebbt se al evakueert. Anwahners, de dor neeg bi wahnt, wo se de Bomb funnen harrn, müssen ut jümehr Wahnung rut.
De Polizei hett vele Straten sparrt. Ok den Bahn- un S-Bahnverkehr mööt se to´n Deel instellen.
Üm de Middagstiet wüllt se dor praat mit sien, bi de dusend Kilo swore Bomb de Anzünders ruttodreihn.
Stand: 20.01.2017, Klock halvig teihn
Plattdüütsch: Cornelia Ehlers

Hamborg sorgt sik üm den Hannel mit de USA

Donald Trump warrt vundaag as ne´e US-Präsident in sien Amt inföhrt. In Hamborg maakt Politik un Wirtschop sik al Sorgen, wat nu ut den Hannel mit de USA warrt.
Wirtschopssenater Frank Horch sä, Hamborg hett veel to verleren.
In de USA gifft dat vele Protesten wegen Trump. Mehrere dusend Lüüd sünd in New York op de Straat gahn un hebbt gegen em un sien Plaans demonstreert.
Stand: 20.01.2017, Klock halvig teihn
Plattdüütsch: Cornelia Ehlers

Striet in de Hannelskamer

In de Hannelskamer löppt de Wahl vun dat ne´e Plenum nich so rund: De Wahlbündnisse hebbt sik böös in de Wull. De Hamborger Politik hett jüm vermahnt, se schüllt sik tosamenrieten. Wat de hunnertsösstigdusend Ünnernehmers wählen schüllt, dor hebbt se jüm nix to raat, dor hoolt se sik rut. Man SPD un CDU bekrittelt de so nöömten Kammerrebellen. Denn de wüllt de Plichtbidrägen afschaffen.
Stand: 20.01.2017, Klock halvig teihn
Plattdüütsch: Cornelia Ehlers

Podcast

Norichten op Platt als Podcast

NDR 90,3

Ut Hamborg und de wiede Welt von moondaags bit sünnovends: die aktuellen Nachrichten auf Plattdeutsch. mehr

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Hör mal 'n beten to: Plattdeutsche Morgenplauderei

Die plattdeutsche Morgenplauderei hören Sie immer montags bis samstags um 10.45 Uhr bei NDR 90,3. mehr

Dat Plattdüütsche Hörspeel

Familiengeschichten, Krimis und Erzählungen: Alle zwei Wochen sendet jede Landeswelle des NDR ein plattdeutsches Hörspiel. Sehen Sie hier die Hörspiele und Sendetermine im Überblick. mehr