Archiv

Norichten op Platt

Ut Hamborg und de wiede Welt von moondaags bit sünnovends Klock 9.30 - die aktuellen Nachrichten auf Plattdeutsch hören Sie von Montag bis Freitag um 9.30 Uhr bei NDR 90,3

OSZE-Drepen

Bi't OSZE-Butenminister-Drepen in'n Dezember maakt se Dele vun Hamborg to Sperr-Rebeten. Wat dat Hamborger Avendblatt schrifft, drööft blots Anwahners mit Utwies na dat Karolinenviddel rund üm dat Flach vun de Mess. Ook Kinner mööt Utwiesen bi sik hebben. Den U-Bahnhoff Raathuus maakt se dicht. Tokamen Dünnersdag gifft dat dorto en Info-Veranstalten. //Stand 27.08.2016 Klock 9:30

A1 twei

De Autobahn 1 twüschen Bad Oldesloe un Bargteheid blifft ook an't Wekenenn in Richt Hamborg en Nadelöhr. De Beton kunn de Summerhitt mit mehr as dörtig Graad nich af. He is opbraken un leeg in Delen op de Fohrbahn. Nu kann een blots twee Sporen vun de A1 bruken. Se warrt wedder tosamenschustert. // Stand 27.08.2016 Klock 9:30

Boostopp in Blanknees

In Blanknees boot se de Flüchtlingsünnerbringen an'n Björnsonweg jümmers noch nich wieder. De Stadt Hamborg keem mit'n Beschwerde vör't Oberverwaltensgericht nich wieder. En Naver will dat Pavilliondörp för bummelig 190 Flüchtlinge nich hebben. In't hele Land hebbt se över den Fall schreven. // Stand 27.08.2016 Klock 9:30

Italien

In Italien gifft dat vundaag'n Staatsgräffnis. Dormit seggt se de Opfer vun't Eerbevern Tschüss. In't hele Land sett se de Flaggen op Halvmast. Middeweken sünd bi dat Eerbevern tominnst 281 Minschen dootbleven. De mehrsten sünd in den Oort Ama'trice sturven. Tominnst 2.500 Lüüd hebbt jemehr Huus verloren. //Stand 27.08.2016 Klock 9:30

Flüchtling in Elv verdrunken

In Hamborg is en Flüchtling in de Elv verdrunken. As de Füerwehr den 19 Johr olen Afghanen güstern Avend in Övelgönn ut dat Water trock, hett he twors noch leevt. Man wat de Polizei seggt, is he denn in't Krankenhuus sturven. //Stand 27.08.2016 Klock 9:30

Football-Bunnsliga

To'n Optakt vun de Football-Bunnsliga hett Bayern München Werder Bremen mit'n 6:0 to Bett schickt. För den HSV geiht de Saison vunnameddag mit'n Heimspeel gegen Ingolstadt los. Se hebbt ook noch de twete Runn vun'n DFB-Pokal utlost. De HSV speelt to'n Enn vun'n Oktober bi'n Drüttligisten Hallescher FC, un de FC St. Pauli speelt an't Millerntor gegen Hertha BSC. //Stand 27.08.2016 Klock 9:30

Exakt un kumpakt - Dat Wedder för uns in Hamborg

Dat Wedder för uns in Hamborg gifft sik vundaag Meuh, is aver nich mehr ganz so hitt as de verleden Daag. So hebbt wi vundaag veel Sünnschien, aver ook Wulken un de Temperaturen schafft dat blots noch op bet to 27 Graad. Dor sünd wi aver noch´n Enn vun weg. In Sinsdörp meet wi totiets 18 Graad.
In de Nacht geiht dat denn aver al mit Regen los. Un mit de een oder anner Flaag mööt wi denn ook morgen reken. Morgen is bi´t Wedder so un so allens meuglich. De Temperaturen kladdert wedder op bet to 30 Graad, gifft an´n Nameddag aver ook mal Dunnerslag, Starkregen, Hagel un düchtig Wind.
//Stand 27.08.2016 Klock 9:30

Nieget Eerdbewern in Italien

In´e Midd vun Italien hett verleden Nacht wedder mehr as 40 Mal de Eerd bewert. In dat Rebeet Latium hett‘t vun´n Morgen noch Eerdstööt mit de Kraft vun 4,8 op de Skala gewen. Noch mehr Hüüs sünd tosamenfollen. Nah dat swore Eerdbewern in de Nacht op Middeweken is de Tahl vun de Doden op middewiel 267 hochgahn. / Stand: 26.08.16 Klock: 09:30

Perzeß üm sexuell Gewalt

In den Perzeß, dat veer jungsche Kerls en Deern woll sexuell Gewalt andahn hebbt, hett dat Optreden vun de Kerls op dat Landgericht Harborg dull för Opregen sorgt. In den Saal vun dat Gericht hebbt sei sik asig hoegt un mit Grienen ehr Frünnen towinkt. Sei schüllt en 14jöhrige Deern Gewalt andahn hebben. En 15 Johr ole Deern, de ok anklagt is, schall dat allens mit Handy opnahmen hebben. / Stand: 26.08.16 Klock: 09:30

A1 ward nieg makt

Autofohrers moet sik op de A 1 in Hamborg vun hüüt Awend an op grode Maleschen instellen. Dat hele Wekenennen kann´n op de Autobohn nah Bremen hen blots op een Spor föhren, süß sünd dat dree. De Hamborger Verkehrsbehöörd seggt, de Straat moet nieg makt warden, wiel in den Asphalt deepe Spleten in sünd. / Stand: 26.08.16 Klock: 09:30

Podcast

Norichten op Platt als Podcast

NDR 90,3

Ut Hamborg und de wiede Welt von moondaags bit sünnovends: die aktuellen Nachrichten auf Plattdeutsch. mehr

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Hör mal 'n beten to: Plattdeutsche Morgenplauderei

Die plattdeutsche Morgenplauderei hören Sie immer montags bis samstags um 10.40 Uhr bei NDR 90,3. mehr

Dat Plattdüütsche Hörspeel

Familiengeschichten, Krimis und Erzählungen: Alle zwei Wochen sendet jede Landeswelle des NDR ein plattdeutsches Hörspiel. Sehen Sie hier die Hörspiele und Sendetermine im Überblick. mehr