Archiv

Norichten op Platt

Ut Hamborg und de wiede Welt von moondaags bit sünnovends Klock 9.30 - die aktuellen Nachrichten auf Plattdeutsch hören Sie von Montag bis Freitag um 9.30 Uhr bei NDR 90,3

Trump gägen Clinton

Bi de Kiekschapp-Debatt vör de Wahl vun den US-amerikanschen Presedenten hebbt sik de Kannedaten asig dull mit Räd un Gägenräd behakt. De demokratsche Hillary Clinton is ehrn Wedderpart scharp angahn vun wägen sien Stüerverkloren, de hei nich apenleggen will. De republikansche Donald Trump hett Clinton vörsmeten, dat sei in de Email-Affair as Butenministersch ehr Plichten nich nahkamen is. Lüüd, de sik de Debatt ankeken hebbt, seggt, Clinton is bi dat ierste TV-Duell gägen Trump klor beter west. / Stand: 270916 Klock: 09:30

Datenleck bi de Füerwehr

De Beopdragte för Datensekerheit in Hamborg hett vun de Füerwehr verlangt, dat sei ehr Datenleck dicht makt. Johannes Casper säd in´t NDR-Fernsehen, de Füerwehr hett de Plicht, dat sei ehr Rekners seker makt. Dat Verbruker-Magazin Markt harr opdeckt, dat de Notfall-Leitsteed Daten vun ehr Insätz an de Notfallautos funkt, ahn dat sei verslöttelt ward. Ein Hacker harr 280.000 vun so´n Informatschonen öwer Patschenten in´t Nett stellt. / Stand: 270916 Klock: 09:30

Windenergie-Meß

In Hamborg hett de weltwiet gröttste Windmeß anfungen. Bunnswirtschapp-Minister Sigmar Gabriel hett hüüt morgen dat Startteken för de Wind-Energy gewen. Bet Fredag wiest miehr as 1.200 Ustellers ut 30 Länners, wat sei allens hebbt. De Meß dreiht sik vör allen üm niege Technik för Windstrom an Land un op See. / Stand: 270916 Klock: 09:30

Stellenafbug bi de Commerzbank

De Commerzbank will de tokamen Johrn woll bi 9.000 Stellen strieken. Dat Hannelsbladd schrifft, dat jede sößte Arbeidsteed bedrapen is. Dormit will de Commerzbank dütlich miehr Steden afbugen, as wi betto dacht harrn. Wat ok Lüüd bedriefsbedingt rutschmeten ward, is noch nich rut. De Baas vun´n Vöstand Martin Zielke will tokamen Fredag seggen, wat hei allens plaant. / Stand: 270916 Klock: 09:30

Pauli hett verluren

In de tweet Football-Bunnsliga hett St. Pauli bi Union Berlin verluren. De Mannschapp vun Trainer Ewald Lienen is mit Null ünner Twee vun´n Platz gahn. Dordörch sünd de Hamborgers op Platz 15 in de Tabell daalrutscht. / Stand: 270916 Klock: 09:30

Exakt un kompakt: Dat Wedder för uns in Hamborg

Hüüt blifft dat mehrstendeels wedder sünnenriek un dörchweg dröög. Blots poor Spiddelwulken sünd twüschendörch mol ünnerwegens, man de behollt ehr Water bi sik. De Wind kümmt lau ut Süd bet Südwest. De Temperatur kladdert bet 23 Grad. Opstunns hebbt wi in Willemsborg 14 Grad.
De Utsichten: Morgen veel Wulken, beten Rägen, un de Wind leggt ornlich to, bi nocheins knapp öwer twünnig Grad. / Stand: 270916 Klock: 09:30

HSV hett ne'en Trainer

Markus Gisdol öbernimmt den Trainer-Posten bi´n HSV. De söbenunveertigjohrige fröhere Hoffenheim-Trainer hett güstern Obend in Hamborg en Verdrag ünnerschreben, un de gellt för disse Bundsliga-Saison. Vundoog wüllt se Gisdol vörstellen, un an´n Nomiddag will he to´n eersten Mool mit de HSVers traineern. Sienen Vörgänger Bruno Labbadia harrn se güstern Vörmiddag den Stohl vör de Döör sett. No dat null to een to Huus an´n Sünnobend, dor steiht de HSV nu op den vörletzten Tabellenplatz.
Stand: 26.09.2016, Klock halbig teihn
Redakschoon: Ines Bott, Platt: Bernhard Koch

Keen Öbereenkomen in Soken Syrien

Ok nu, wo in Syrien so gräsig bombardeert warrt, ok nu köönt sik de Vereenten Natschoonen nich enigen doröber, woans man dor gegenangohn kunn. För dat mehr un mehr Hoochschaukeln vun de Gewalt, dor hebbt sik Russland un de westlichen Stooten gegensiedig de Schuld geben. Dat Rode Krüüz hett meldt, dat no mehrere Städer, de belogert warrt, Transporte mit Hölp dörkomen sünd - to´n eersten Mool siet knapp söss Moond.

Vele Fohrgäst beklaut

In de Bohnhööf un in de Iesenbohn-Tööch, dor warrt jümmer mehr klaut an Daschen un anner Bagoosch. Dat meldt de Süddeutsche Zeitung, un se will dat vun de Bundspolizei to weten kregen hebben. Verleden Johr schüllt de Langfingers fiefunveertig-dusend Mool tosloon hebben, dat is een Viertel mehr as in´t Johr vörher. Dor achter steken schüllt meisttieds Profi-Banden, de internatschoonol op Beute-Toch goht.

Start vun de Klima-Week

In Hamborg hett de Klima-Week anfungen. In de tokomen Doog gifft dat in de Stadt mehr as hunnert Veranstaltungen to socke Themen as Ümweltschutz un Klimawannel. Dorbi geiht dat vör allen üm en bewussteren Lebens-Stil. To´n Bispeel mookt se Vördrääg öber so nöömte "nachhaltige Geldanlogen" un ok doröber, woans man inköpen kann, ohn dat de Ümwelt belast‘ warrt.

Podcast

Norichten op Platt als Podcast

NDR 90,3

Ut Hamborg und de wiede Welt von moondaags bit sünnovends: die aktuellen Nachrichten auf Plattdeutsch. mehr

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Hör mal 'n beten to: Plattdeutsche Morgenplauderei

Die plattdeutsche Morgenplauderei hören Sie immer montags bis samstags um 10.45 Uhr bei NDR 90,3. mehr

Dat Plattdüütsche Hörspeel

Familiengeschichten, Krimis und Erzählungen: Alle zwei Wochen sendet jede Landeswelle des NDR ein plattdeutsches Hörspiel. Sehen Sie hier die Hörspiele und Sendetermine im Überblick. mehr