Na den Unfall an'n Hauptbahnhoff güstern löppt de S-Bahnverkehr jümmer noch nich rund. Keen vun de S-Bahnen kann na den Hauptbahnhoff rinfohren. All fohrt se ut jemehr Richtens bet een Statschoon vör den Hauptbahnhoff. Wokeen na'n Flooghaven hen will, de mutt also an't Berliner Door instiegen. Güstern is en Botog op de Schien vun de S-Bahn in'n Hauptbahnhoff gegen en Brüch kracht. Wat dat heet, duert dat noch länger, bet se em vun dor wegtransporteert hebbt.
De Mitarbeiders vun Galeria Karstadt Kaufhof sünd al wedder bang. De Insolvenzverwalter will hüüt Vörmeddag mehr över dat Dichtmaken vun enkelte Filialen seggen. Siet güstern weet wi, dat vun mehr as 90 Hüüs, 16 Standoorten dicht maakt warrt. Noch hebbt se nich künnig maakt, wat för welk dat sünd. Man dat geiht woll üm 1.400 Arbeitssteden, de dor nu wegfallt.
Dat sünd noch knapp annerthalv Maand bet na de Europawahl - un de SPD geiht vundaag in Hamborg in den groten Wahlkamp. Bunnskanzler Olaf Scholz un Topkandidatin Katharina Barley warrt na'n Fischmarkt hen kamen. De SPD-Böversten hebbt sik bewusst för düssen Oort för den Wahlkampf entscheedt. Generalsekretär Kevin Kühnert sä, Hamborg wöör as Door na de Welt as meist keen anner Stadt för Demokratie, Freden un Riekdom stahn.
Jümmer noch söcht se na den söss Johr olen Arian ut Bremervöör. Dat Kind is autistisch. He is vun sien Tohuus an'n Maandagavend weg un hett nix Warms antrocken. Mehre hunnert Insatzkäft söcht em nu al siet Dagen. Güstern hebbt se ok en Heevschruver insett. De Bunnswehr is mit Nachtsichtreedschoppen ünnerwegens De Polizei hett en Telefon för Henwiesen inricht.
De Ukrain kriggt noch mehr Militärhölp ut de USA. Dat geiht dorbi üm en Paket in'n Weert vun söss Milliarden Dollar, wat de US-Regeren freegeven hett. De Minister för Verdeffernderen Lloyd Austin seggt, dor warrt sünnerlich Munitschoon för Artillerie un de Patriot-Floogafwehrsystemen levert. Güstern harr de ukrainsche Hauptstadt Kiew twee Krankenhüüs rüümt. Se weern bang vör en russ'schen Angreep.
De Geschicht vun de Elektrik, de Malerie oder de Geschicht vun den Kaffe - dat sünd blots poor Themen, över de een sik bi de Lange Nacht vun de Museen klook maken kann. De fangt vunavend Klock söss an un 50 Hamborger Museen, Utstellenshüüs un Gedenkoorten maakt dorbi mit. Wokeen en Koort för de Nacht vun de Museen hett, de kann dat ok för den HVV bruken.
Ji wüllt Fröhjohr? Ji kriegt Fröhjohr! De Sünn is vundaag mal nich mehr ganz so torüchhöllern as de letzten Daag un maakt dat ok düütlich wat warmer. Op bet to 18 Graad schafft de Temperaturen noch. Villicht kann to’n Nameddag doch noch mal en lütt beten wat Natts vun baven kamen. Man keen weet, villicht överleggt sik Petrus dat ja ok noch anners.
morgen.
Morgen geiht sogor noch mehr. Dor schafft de Temperaturen dat op bet to 21 Graad.
