Wi snackt platt
Sonntag, 25. Juni 2023, 08:30 bis
09:00 Uhr
Sünndagmorgen, Klock Ölven, geiht dat los mit uns grote Vertell doch mal-Gala in’t Ohnsorg-Theater. Op ndr.de/platt köönt Ji via Internet-Livestream mit dorbi ween un dat warrt spannend: 25 Geschichten un jümehr Autorinnen un Autoren gaht in’t Rennen för de Priesen vun tohooprekent mehr as 5.000 Euro.
Evana Yemaneh: Ü18-Priesdrägersch ut Hamborg
Een Winnersch bi "Vertell doch mal", de steiht al nu fast: Dat is de Winnersch vun uns Ü18-Pries för junge Lüüd ünner 18 Johr. Wi graleert vun Harten Evana Yemaneh ut Hamborg-Horborg! Evana is ölven un hett en Geschicht över en lütte Pinguin-Deern schreven, wo dat üm den Klimawannel geiht. Bi "Wi snackt Platt" stellt wi Jo Evana un ok ehr Familie vör.
Junge Plattsnackers in Berlin
Wokeen sind wi egens? Wat maakt uns ut? Un: Woans defineert wi uns as Deel vun een Minnerheit oder Spraakengrupp? Düsse Fragen hebbt sik verleden Weekenenn junge Lüüd twüschen 18 un 35 Johr stellt. Üm un bi dörtig junge Minschen weern dat. Se all höört en natschonale Minnerheit to – un, kloor, junge Plattsnackers, de weern ok mit dorbi. Dat erste Drapen vun düsse Oort weer dat un dor stunn Masse op’t Programm: Workshops, Snackrunnen un Drapens mit Politikers . "Wi snackt Platt"-Reportersch Lina Bande, de harr de Schangs mal mit veer junge Lüüd to snacken, de dor in Berlin mit dorbi weern. Ünnerhalen hett se sik mit Jan Dittmers ut Neddersassen, Vanessa Teichmann ut Meckelnborg-Vörpommern, Jonas Honekamp ut Nordrhein-Westfalen un Mia Großmann, de ut Sleswig-Holsteen kümmt, man nu in Hamborg tohuus is. Allerhand to weeten kregen hett Lina Bande vun de jungen Lüüd över düssen Uttusch in Berlin.
Jungs Deerns leest Platt: "Prinzessin op'e Arft" un en Bummel över de Reeperbahn
Wat weer dat för en schönen Vörmiddag! Verleden Sünndag hebbt in’t Ohnsorg-Theater sösstein Schölersche un Schölers vun’e drüdde Klass bet to’t Abitur jümehr Geschichten vörleest – bi de Endrunn vun „Jungs un Deerns leest Platt“, den plattdüütschen Lesewettstriet vun’e Hamborger Scholen. Een vun de eersten Priesen hett Amilia Blank kregen. Amilia geiht in'e föffte Klass vun't Imanuel-Kant-Gymnasium in Horborg. Bi "Wi snackt Platt" is se mit ehr Siegergeschicht to hören, en Märken, dat Ji seker all kennt: "De Prinzessin op'e Arft" in en plattdüütsche Faten vun Uwe Michelsen.
Wat besünners schöön weer bi düsse 42. Utgaav vun "Jungs un Deerns leest Platt": ok junge Lüüd ut de teihnte bet to de dörteihnste Klass weern mit dorbi un hebbt jümehr Geschichten vördragen. Den eersten Pries in düsse Kategorie hett Sophie Fick kregen. Se geiht in’e Oberstuuv vun’t Friedrich-Ebert Gymnasium in Neefell un ehr Geschicht "De lütte Brödigam" vun Fiene Meier hannelt vun en Bummel mit ehr Grootmudder över de Reeperbahn. Ok düsse Geschicht kriegt Ji bi "Wi snackt Platt" to hören.
Moderatschoon: Jan Wulf
Schlagwörter zu diesem Artikel
Plattdeutsch
