Hart Dörchgriepen gegen Straafdäters op Islamisten-Demos – Bunnsbinnenministersch Nancy Faeser seggt, dat schüllt de Sekerheitsbehörden vun de Länners doon. Wokeen dat Kalifat wull, de is in Düütschland nich richtig, dat hett se op de Plattform X schreven. Achtergrund is en Demo vörgüstern in St. Georg. Mehr as 1.000 Minschen weren tosamen kamen, üm gegen en Poltik to protesteren, de - wat se menen - gegen den Islam weer. De Veranstalter steiht dicht bi de Grupp „Muslim Interaktiv“. Se warrt vun den Verfatensschutz as seker extremistisch inornt.
Düsse Billers sünd üm de Welt gahn: En Vadder föhrt mit sien Auto op dat Rullfeld vun den Hamborger Flooghaven un will, dat he un sien Dochter na de Törkei utreisen dörvt. 18 Stunnen weer de Flooghaven dorüm spaart. Dusende vun Passageren weren dorvun bedrapen. Vun hüüt af an steiht de 35 Johr ole Mann vör dat Hamborger Landgericht. De Staatsafkaatschop schmitt em Geiselnahm, Kinnsröverei, Körperverletzen un Wapenbesitz ahn Verlööf vör.
Ne’er Gegenwind för MSC-Deal: En vun de gröttsten Havenbedrievers op de Welt, PSA ut Singapur, de hett woll Bedenken gegen dat plaante Geschäft twischen de städt’sche HHLA un de Rederee MSC. Wat NDR 90,3 weet, hett sik de PSA dorüm an de EU Kommission wendt. De Hamborger Senaat will den Deal mit de Rederee MSC egens in Sommer fastmaken.
12 Perzent mehr Lohn, minnstens aver 400 Euro in’n Maand: Dat will de Warkschop ver.di in de Tarifverhanneln mit de Telekom hebben. Un wiel dat ut Sicht vun ver.di nich recht vörangeiht, roopt se de Beschäftigten wedder to’n Warnstreik op. Ok hier in Hamborg: In de Binnenstadt wüllt hüüt Vörmiddag rund 1.000 Beschäftige vun de Telekom ut ganz Noorddüütschland op de Straat gahn.
Mal gau röber na Finkwarder: Vundaag geiht de Sommerfohrplaan vun de HADAG los. Op de Streek 62 twüschen Lannungsbrüchen, Finkwarder un Neemöhlen föhrt nu Fähren bavento. Un de 15 Minutentakt, de geiht bet veerdel na Teihn an’n Avend. Ok twüschen Lannungsbrüchen un Elvphilharmonie föhrt nu wedder de Fähren – tominnst an Wekenennen un an Fierdaag is dor de Linie 72 ünnerwegens.
Ok bi de grote Söök güstern is nix rutsuert: De söss Johr ole Arian ut Bremervöörd de blifft ok noch na een Week verschwunnen. 1.200 Hölpers harrn güstern na em söcht. Mit Hunnerte vun Insatzkräfte un en lange Minschenkeed. De Polizei nümmt an, dat de austist‘sche Jung verleden Maandag vun Tohuus weglopen weer. Se geiht nich vun en Straafdaat ut. Vundaag wüllt se wieder söken.
Hüüt hebbt wi en Melange ut Wulken un Sünn. Ok Saharastoff is mit dorbi un maakt den Heven en beten schummerig. Dat is meist dröög bi bet to 20 Graad. Opstunns meet wi bi ju op Finkwarder 11 Graad. Morgen warrt dat meist so as hüüt bi bet to 23 Graad.