Bi de Europawahl hett bi uns in Düütschland de Union mit 30 Perzent de mehrsten Stimmen afkregen. Verglickt een dat mit de verleden Wahl, hebbt CDU un CSU ’n beten wat an Stimmen bavento kregen. So as de Bunnswahlleitersch dat seggt, kummt de AfD mit 15,9 Perzent op Platz 2. De Partei hett dormit düütlich wat toleggt. De SPD verlütt ’n beten wat an Stimmen un kummt op 13,9 Perzent. An’n düütlichsten verloren hebbt de Grönen – se kaamt op 11,9 Perzent. Dat Bündnis Sahra Wagenknecht hett 6,2 Perzent vun’e Stimmen kregen. De FDP hett ’n beten wat verloren un kummt nu op 5,2 Perzent. Un de Linke verlütt düütlich un liggt nu bi 2,7 Perzent.
Kickt een op Hamborg, denn süht dat ganze Bild al düütlich wat anners ut: Bi uns in’e Stadt hebbt de Grönen de mehrsten Stimmen haalt. Se kaamt op 21,2 Perzent. De SPD kummt bi uns in Hamborg op 18,7 Perzent. Dicht achterran kummt denn de CDU mit 18,4 Perzent. Bi de AfD hebbt in Hamborg 8 Perzent vun’e Lüüd jümehr Krüüz maakt, bi de FDP 7 Perzent. De Linke schafft dat op 5,1 Perzent un de Partei Volt haalt 6 Perzent.
Blangen de Europawahl sünd de Lüüd in Hamborg güstern ok dorto opropen ween, de söven Bezirksversammeln to wählen. Man dor güng dat eerst hüüt Morgen mit los, dat se de Stimmen uttellen doot. Vör fief Johr hebbt ok hier de Grönen mit histoorsch hoge Tahlen de Nees ganz kloor vörn hatt.
So as in mehre anner europäisch Länner hebbt bi de Europawahl ok in Frankriek de Rechten düütlich wat an Stimmen bavento kregen. Un dor is nu de franzöös’sche Präsident Emmanuel Macron düütlich wat op ingahn. Denn güstern hett he de Natschonaalversammeln oplööst hatt. Un nu mutt in Frankriek nee wählt warrn un dat al in üm un bi veer Weken. Macrons Regerenslager hett bi de Europawahl knapp 15 Perzent vun’e Stimmen kregen, man de rechtsnatschonale Partei Rassemblement National üm Marine Le Pen is op’e anner Siet mit mehr as dubbelt so veel Stimmen op bet to 32 Perzent kamen.
An’n Hamborger Flooghaven hett dat wedder en Sekerheitspann geven, denn en Keerl is dor güstern över en tweeunhalf Meter hogen Tuun kladdert un op dat Flach vun’n Flooghaven lopen. As se em fastnahmen hebbt, sä de 30 Johr ole Mann, dat he den Weg afkörten wull, üm na de Terminals hentokamen. De Bunnspolizei snackt dorvun, dat de Floogbedrief bummelig 20 Minuten lang ünnerbraken ween is. Is noch gar nich so lang her, dor harrn se na mehre Vörfäll bi de Sekerheit an’n Hamborger Flooghaven eerst ’n Gang toleggt hatt.
"Ik heff allens geven, wat ik kunn" – dat sä Alexander Zverev (kloor op Hoochdüütsch) na dat Tennis-Finaal in Paris. De Hamborger Profi-Jung hett bi dat Endspeel vun’e French Open een op’e Mütz kregen hatt un na fief Sätz gegen Carlos Alcaraz ut Spanien verloren. Un denn gifft dat noch wat bi’n Football to vertellen: So as dat utsüht, warrt de FC St. Pauli woll ahn Fabian Hürzeler kloorkamen möten. De Trainer verlett Hamborg mööglicherwies in Richt na Grootbritannien hen, denn in’e engelsche Premier League hett de Club Brighton en Oog op Hürzeler smeten.
De Dag vundaag güng noch mit egens recht veel Sünn goot wat los, man mit Regen warrt de Dag vundaag to Enn gahn, denn de Wulken warrrt na un na mehr un bringt denn later an’n Namiddag un na’n Avend hen Regen mit sik bi Temperaturen vun nich mehr as 15 Graad. Un morgen kriegt wi denn jüst so as vundaag vun allens ’n beten wat af: Wulken, Sünn, hier un dor dat een oder anner Regenschuer, sülvst enkelte Gewidder sünd morgen mööglich un dat Ganze denn bi Temperaturen vun so as vundaag ok nich mehr as 15 Graad.
