In Hamborg sünd an'n Eersten Mai dusende Minschen op de Straten gahn: Dütt Johr geev dat drei grote linke Demos – anners as in de verleden Johren ahn en swarten Block. En groot Deel vun de Minschen harr sik bunte Kledaasch antrocken. De Polizei is mit bannig veele Beamten dor ween, man veel to doon harrn de nich: De Dag leep positv, sä de Polizei. Dat geev kuum Twüschenfäll.
Güstern geev dat wedder Kundgaven för de Rechten vun Arbeiders un anner Anstellten. De Düütsche Warkschopsbunn DGB sä: Sövendusend Minschen weren bi sien Kundgaav in Hamborg op'n Fischmarkt mit dorbi. Föddert worrn is ünner annern mehr Lohn, mehr Freitiet un mehr Sekerheit. Ok in Harborg un Bardörp geev dat DGB-Demos mit jeedmal en poor hunnert Lüüd.
Schall dat an'n S-Bahnhoff Holstenstraat in Altno en Drogenruum för Lüüd, de Crack bruukt, geven? De Baassche vun't Bezirksamt, Stefanie von Berg, sä to NDR 90,3, dat över sowat graad nadacht warrt. Ok Sozialarbeiters schullen denn för de Süchtigen dor ween. Achtergrund is, dat de Drogenszeen üm'n Bahnhoff Holstenstraat bannig groot worrn is.
De Mordperzess to'n Angreep in en Regionaltog in Brokstedt is bald to End. Vundaag schall dat vör't Landgericht Itzehoe de Plädoyers vun de Staatsafkaatschop un vun de Gegensiet geven. Anklaagt is en veerundörtig Johr olen Mann. He schall in'n Januar 2025 in en Tog vun Kiel na Hamborg op Fohrgäst instoken hebben. Twee Minschen sünd ümkamen. De Staatsafkaatschop höllt den Anklagten för vull schulddüchtig. Sien Afkaat wiest dorop, dat he psychisch krank weer.
In Hamborg gifft dat bald mehr Tolagen bi de Polizei un de Füerwehr. Vun'n Sommer 2025 af an, schall dat in'n Maand dreiunveertig Euro mehr geven – in't Johr dorop denn noch mal teihn Euro mehr. In de Summ kummt dorbi denn en Tolaag vun eenhunnertachtig Euro rut. Dat weer denn so hooch as ok in Neddersassen un in de anner Noordlänner, heet dat vun de Binnenbehöörd. De Düütsche Polizeiwarkschop bekrittelt dat: Dat Geld wöör nich utreken, üm de Deensten attraktiv to maken – ok wegen de hogen Mieten in Hamborg.
In Hamborg loopt de Vörbereiten för dat Derby in de Twete Football-Bunnsliga. HSV-Fans arbeidt al an en Choreographie. De HSV un ok Sankt Pauli plant al Fan-Märsch. Se schüllt man streng vuneenanner trennt lopen. Sankt Pauli kunn ut egen Kraft in de Bunnsliga opstiegen – wenn se sik gegen'n HSV dörsett. För'n HSV geiht dat üm de letzt Chance op'n Relegatschonsplatz.
Vundaag gifft dat eerst mal wedder veel Sünn. To'n Avend hen treckt man en poor Wulken ran un dat mach ok en lütt beten regen. De Temperaturen klattert op bet to süssuntwintig Graad. Ok morgen mal mehr Sünn, mal mehr Wulken: deelwies ok wedder mit Regen dorbi. Dat warrt wedder köler: Denn blots noch bet to eenuntwintig Graad.