Noch föhrt jeden Dag 34.000 Fohrtüüch över de Köhlbrandbrüch henweg. Doch de is bilütten rott. Plaan is nu, dor an Steed vun de ole Brüch en ne’e hintosetten. Un hierför is de Börgerschop in Hamborg güstern ne ganze Eck för wiederkamen. Mit de Stimmen vun SPD un de Grönen warrt nu Geld praatstellt, üm de ganze Saak wiederplanen to könen. Dorbi geiht dat üm 290 Millionen Euro. De Oppositschoon bekrittelt, dat dat allens bet nu al en ganzen Barg wat an Geld köst hett. Und dat vör allen Dingen ok, wiel dor en ganze Tiet lang över en Tunnel snackt worrn is.
In de Elvkinner-Kitas warrt wedder streikt. Dat geiht üm de Lüüd, de in’e Köök arbeiden doot un de för dat Reinmaken tostännig sünd. De Warkschop Ver.di harr dorto opropen. Un dormit geiht de Streik in’e Kitas, de de Stadt tohören doot, nu al in’e sösste Week. De Arbeitgebersiet hett anbaden hatt, in dree Etappen tohoopnahmen veerteihn Perzent mehr wat an Geld to betahlen. För düt Johr weren dat veer Perzent mehr. Dat is de Warkschop aver to wenig. De Streik is eerstmal för hüüt un morgen ansett. Un denn leggt welk Lüüd ok noch an anner Steden jümehr Arbeit daal. Dat is neemich bi welk Banken vundaag de Fall. Bi Steden vun UniCredit, Düütsche Bank un Commerzbank mööt Kunnen vundaag dormit rekent, dat dor deswegen villicht ok nich allens ganz so aflopen deit as normalerwies.
De Tahl vun’e Verbreken in Hamborg, de to Papeer bröcht worrn sünd, de geiht na ünnen. Dat is tominnst ut de Tahlen för de eersten fief Maand för düt Johr ruttolesen. De Polizei tell in düsse Tiet knapp 100.000 Straafdelikten – dat sünd üm un bi fief Perzent weniger as vörher. Sowat as Klauen un dat Inbreken in Wahnungen is noch düütlicher wat weniger worrn. Bi Moord is de Tahl meist üm dat Halve trüchgahn. Op’e anner Siet is de Tahl vun de Fäll, wo dat üm gefährliche un swore Körperverletzen gahn deit, üm acht Perzent wat na baven gahn. Un bi Roov sünd goors tweeuntwintig Perzent mehr wat an Fäll tellt worrn.
För Lüüd, de op’e Flucht sünd, gifft dat in Hamborg in Meiendörp siet goot acht Johr en Steed, wo se ankamen köönt. Man, dat kunn sik nu Anfang vun dat tokamen Johr ännern. Denn de Mietkkuntrakten för dat Ankamenszentrum an’n Bargkoppelweg gaht to Enn. De Binnenbehöörd hett sik dorför nu en ne’e Steed överleggt. Un dat schall dat ole Telekomhuus in Wandsbeek ween. Dat wullen se denn hüern un ümboen. Denn dat Huus steiht al siet Johren leer. Un dor kunn een ok goot mit Bus un Bahn henkamen un dat geev dor noog Ecken, wo een Sport maken un sik ophollen kunn.
Nu liggt he op’n Disch: De Vörslag för en ne’en Wehrdeenst. Verdedigensminister Boris Pistorius will en Papeer mit Fragen an junge Lüüd verschicken laten. Op düssen Weg wüllt se so denn eerstmal üm un bi 5.000 ne’e Lüüd mit tohoopkriegen. Bekrittelt warrt de ganze Saak vun CDU un CSU: De Union stött sik doran, dat nüms wohrhaftig för en ne’en Deenst in’e Plicht nahmen warrt. Ganz anners seht dat de AfD un dat BSW: Se snackt vun Kriegsluun un Kriegsrhetorik.
Egens süht dat ganz goot ut hüüt Morgen, man dat is aver ok koolt. Opstunns sünd dat teihn Graad in Altna. Mehr as sössteihn Graad warrt dat vundaag aver ok nich. Un alltohoop süht de Dag vundaag so ut as de verleden Daag ok al: De Sünnschien warrt ümmer mal wedder ünnerbraken vun dat een oder anner Regenschuer. Un morgen maakt dat Wedder denn meist nochmal so wieder as vundaag bi Temperaturen vun bet to twintig Graad.
Egens wull de Hamborgische Börgerschop jo noch vör den Sommer den Weg freemaken för den Havendeal mit de Schwiezer Rederee MSC, de jo bannig ümstreden is. Nu duert dat aver doch länger, wiel de Opposischoon dörchsett hett, dat dat vöraff noch en öffentliche Änhören geven schall. Wieldess SPD un Gröne meent, dat is good, Dele vun de HHLA an MSC to verköpen, sünd FDP, Linke un de AfD wieder dorgegen.
