In’n Süüdoosten vun de Türkei hett verleden Nacht heel dull de Eerd bevert. Dat weer in de Negde vun de Grenz na Syrien; dat Bevern harr de Stuuf vun 7,4 bet 7,9. De Türkei hett den baversten Graad vun Alarm utroopen un üm internatschonele Hölp anfragt. Al nu seggt se, in beid Länners tohoop nahmen sünd tominnst sößhunnert Minschen to Dode kamen. De Behöörden in de Türkei seggt, opstunns sünd Hölpslüüd ut all Ecken vun dat Land ünnerwegens na dat Rebeet, wo de Eerd bevert hett.
De Keerl, de woll de Metzattack in den Regionaltog bi Brookstedt makt hett, harr woll sülvst een Vergliek mit Anis Amri treckt, de den Anslag op den Breitscheidplatz daan hett, un twors twee Mande, vördem he ut de Ünnersökenshaft in Hamborg freelaten worden is. Dat steiht so in de Ünnerlagen vun dat Kaschott. Mitarbeiders vun de JVA säden, he schall seggt hebben: „Dat gifft nich blots een Anis Amri, dat gifft mehr, un ik bün ok een!“ De Hamborger Justizbehöörd seggt, se hett eerst na den Metz-Anslag vun düssen Vergliek hüürt.
Na de mörderische Metzattack in den Tog bi Brokstedt hett dat güstern de Truerfier geven. Een poor hunnert Minschen hebbt in en Gottsdeenst in Neemünster an de Minschen dacht, de dor üm bröcht worden sünd. Bi den Gottsdeenst mit bi weern blangen Fomilie un Frünnen ok Bunnskanzler Olaf Scholz, de Eerst Börgermester vun Hamborg Peter Tschentscher un de Ministerpresdent vun Sleswig-Holsteen Daniel Günther.
Hamborg hett noch en Reeg vun Areale, wo en Wahnungen booen kunn. NDR 90,3 hett rutfunnen, dat en dor theoretsch eenunachtigdusend Wahnungen hensetten kunn. De Behöörd för Stadtentwickeln seggt, Ja, dat is so. De Verband vun de Nuurddüütschen Wahnungsünnernehmers meent, düsse Tahl hüürt sik siehr good an, fordert man bi de Bezirke in, dat de dat Boorecht ok duller dörchsett, gegenöver Börgerinitiativen, de dat booen verhinnern wüllt.
Nadem se en Waterliek funnen harrn, ünnersöcht de Polizei den Fall wieder. Middewiel seggt se, dat dat wohrschienlich en Unfall west is. Güstern harrn se de Liek vun en Keerl in den Seebek-Kanaal in Barmbeek funnen. Düker vun de Füerwehr hebbt de Liek ut dat Water treckt.
Hüüt un morgen warrt bi de Post wedder de Arbeid daalleggt. De Warkschopp Verdi hett to düssen Warnstreik opropen. De Mitarbeiders in de Zentrums för Breefe un Paketen un ok de Postbüdels schüllt ehr Arbeid daalleggen. So will Verdi vör de neegst Runnen vun de Verhanneln in den Tarifstriet mehr Druck maken. Verdi verlangt föffteihn Perßent mehr Geld för de Mitarbeiders, un de Verdrag schall een Johr lopen.
Vundag hebbt un beholt wi veel Wulken an’n Heven över uns, man dat gifft blots hen un wenn beten Sprüttenregen, mehrstendeels blifft dat dröög, un na’n Nahmeddag henn kann’t ok’n Spierken Sünnenscahien geven. De Temperatur kladdert bet veer Graad. Opstunns hebbt wi in Fuhlsbüddel noch Minus Dree Graad. De Wind dorto kümmt lau ut Nuurd bet Oost. Un so geiht dat wieder: Morgen fröh dakig, later mehr Sünn as Wulken un dröög bi nich veel anner Temperatur as hüüt.
