In Scholen, Bedrieven un Behöörden – allerwegens in Hamborg sünd opstünns en Barg Lüüd krank. Liggen deit dat an de Gripp, an Corona un an dat RS-Virus. De AOK weet, dat sik mehr as dubbelt so veel Minschen krankmellt as vör Corona. De Tall is op 26.000 anstegen. Sünnerlich Lehrers un Lüüd, de in en Behöörd arbeidt, sünd jüst krank. Teemlich hoochgahn is ok de Tall an Minschen, de mit en Gripp to Bett liggen doot.
Na de groten Razzien gegen de Rieksbörger-Szeen güstern, kaamt nu mehr un mehr Details vördag. De Sekerheitsbehöörden schüllt al siet Fröhjohr wusst hebben, dat Rieksbörgers de Regeren afsetten wüllt. Dat weer ok vun den Präsident vun’t Bunnsamt för Verfatensschuul, Thomas Haldenwang, to hören. He stell rut, dat de düütschen Sekersheitsbehöörden de Laag jümmers in’n Griff harrn.
Vundaag probeert de Behöörden in ganz Düütschland för den Eernstfall de Systemen to't Wohrschau geven ut. In 90 Minuten warrt denn ok in Hamborg de Sirenen hulen. Ok över’t Handy warrt Testmellens rutschickt. Viddel vör 12 schall dat denn en Teken geven, dat allens vörbi is. Bi den eersten Test vör twee Johr weer noch böös veel scheef lopen.
Vör’t Landgericht München is de Perzess üm een vun de gröttsten Wirtschopsschkandolen vun de düütsche Nakriegsgeschicht anfungen. Se leggt den fröheren Vörstandsvörsitter un twee anner Managers vun Wirecard Bandenbedregeree, Untreue un Marktmanipulatschoon to Last. De Böversten vun den Betahldeenstleister schüllt över Johren Geschäften to’n Anschien in Milliardenhöögde to Papeer bröcht hebben. So hebbt se hoge Krediten ranswinnelt.
De Hamborger Lannsvörstand vun de Junge Union will, dat sien Vörsitter ut’t Amt geiht. Benjamin Welling warrt vörsmeten, dat he Oorkunnen namaakt un bi de Versekern bedragen hett. Vör en poor Daag harrn veer vun söven Hamborger Kreisverbänn verlangt, dat he sien Hoot nehmen schall. Nu gifft Welling sien Posten to’n 2. Januar af un övernimmt bet dorhen ok keen Amtsgeschäften mehr.
Tokamen Johr schall de Hamborger Süden beter anbunnen warrn. Denn geiht dat los mit den Shuttle-Service HVV Hop, de een bet nu as ioki kennen deit. Vun Switch schüllt ne’e Statschonen för Car-Sharing dortokamen. Bi en Infoveranstalten hebbt sik de Lüüd in Horborg ok en Fohrrad Rikscha-Deenst wünscht, dat se öllere Minschen na’n Dokter oder to’n Inköpen fohren köönt.
Vundaag sünd wedder veel Wulken an’n Heven, de an’n Vörmiddag noch Sneeregen oder Sneeschuern un later Regen mitbringt. An’n Namiddag warrt dat dröög. De Temperaturen schafft dat nich över dree bet veer Graad rut. Opstünns hebbt wie een Graad op de Veddel. Morgen fangt de Dag mit Regen- oder Sneeschuern an, later waagt sik ok de Sünn mal rut. Dat Ganze bi Null bet een Graad.
