Kuum Drüppens an Regen in Hamborg un dat nu al över Weken henweg. Man in‘e Stadt is dat Wedder ganz ünnerscheedlich to marken. De BUND wohrschaut, düsse dröge Tied möök vör allen Dingen Amphibien to schaffen. Un de Buernverband in Hamborg is bang, dat de Planten op’n Acker weniger utdrieven doot, wenn de Regen wiederhen utblieven deit. Man de Goornereen op’e annern Siet freit sik över dat dröge Wedder. Denn bi Sünn verkööpt se denn mehr Planten.
De FC St. Pauli kann egens nu al för de neegste Bunnsliga-Saison planen. Un dat liekers se düssen Sünnavend nu nochmal dat letzte Tuur tohuus gegen Bochum ran mööt. Denn nadem se güstern twee to twee liekop gegen Frankfurt speelt hebbt, is dat egens blots noch op’t Papeer mööglich, dat se afstiegen doot. Denn dat Team vun Trainer Alexander Blessin hett nu dree Punkten Vörsprung op den Relegatschoonsplatz un bavento hebbt se denn noch de düütlich betere Tordifferenz as Heidenheim, de achter jüm dicht op nakamen doot. Un ok de HSV-Fans hebbt güstern nochmal ornlichen Grund to fiern hatt: Denn nadem Sünnavend al de Mannslüüd opstegen sünd, hebbt de Froenslüüd jüm dat nu güstern liekmaakt un dat ok na de Bunnsliga hen schafft.
In dat Ringen üm en Enn vun den russ‘schen Angreepskrieg op de Ukrain steiht nu in’n Ruum, dat sik de beiden Staatsböversten mööglicherwies drapen doot. Denn de ukrain’sche Präsident Wolodymyr Selenskyj sä, he wull düssen Dunnersdag nu na Istanbul hen reisen, üm dor to verhanneln. Un dorbi wies he sik denn ok praat, direktemang mit den Kreml-Böversten Wladimir Putin to snacken. Denn de harr dat vöraf vörslaan hatt, in’e Törkei to verhanneln. En Anter ut Russland op dat frisch Anbott vun Selenskyj steiht aver noch ut.
En Havengeboortsdag mit veel Sünn, vergnöögt un ahn veel Larm un Arger. So tominnst kickt Weertschopssenatersch Melanie Leonhard op dat verleden Wekenenn. Bi NDR 90,3 snack se vun 1,2 Millionen Lüüd, de dor an’e Lannungsbrüchen ween sünd. Güstern Avend güng de Fier mit de Utloopparaad to Enn.
Wokeen in’n Noorden vun Hamborg de U1, dat is de blaue Lien, bruken deit, de mutt sik dor op instellen, dat dat allens wat länger duern deit. Denn twüschen de Hoolsteden Ossentoll un Fuhlsbüddel Noord föhrt af vundaag keen U-Bahnen mehr. Un dat blifft ok de ganze Week so. Denn so as de Hoochbahn dat seggt, maakt se dor in düssen Afsnitt de Wieken nee. An Steed vun’e Bahnen föhrt dor aver Bussen. Liekers is een so bi üm un bi twintig Minuten wat länger ünnerwegens.
De vörmalig Böverste vun dat Bezirksamt in Altna, Hinnerk Fock, is doot. So as de FDP-Lannsverband dat seggen deit, is Fock in’t Öller vun 81 Johr dootbleven. He harr de Liberalen as Top-Kandidaat bi de Börgerschopswahl 2008 vertreden mit sien Markenteken, en Fleeg. Vun 2003 bet 2007 stünn Fock bavenan bi dat Bezirksamt in Altna.
Un dat geiht meist so wieder, as wi dat al kennen doot: Veel Sünn, kuum Wulken un wiederhen dröög bi Temperaturen vun bet to twintig Graad. Opstunns sünd dat acht Graad in Langenhoorn. Un de Utsichten: Ok morgen warrt dat nich veel wat anners as vundaag. Man mit Temperaturen vun bet to tweeuntwintig Graad, warrt dat denn noch ’n lütten Tick wat warmer as vundaag.
