Wi snackt platt

Plattvent, Jekyll & Hyde un den Wiehnachtsmann sien Hütt

Sonntag, 04. Dezember 2022, 08:30 bis 09:00 Uhr

Die Musikgruppe "Plattvent" (v.l.n.r.): Bert C. Biehl, Gert Drögemüller und Uwe Rimsa.

Dütmal geiht dat bi "Wi snackt Platt" üm de Musikgrupp Plattvent, een Översetter vun Weltliteratur un den Wiehnachtsmann sien Hütt.

De Grupp "Plattvent"

Dat is nu meist acht Johr her, dor hett sik de Musikgrupp "Liekedeler", de wirklich lange Johrn mit bannig veel Erfolg in Plattdüütschland ünnerwegens weer, oplööst. Dat is de slechte Naricht. De gode Naricht is: bi dree vun de Band jöökt dat jümmers noch in de Fingers, un se hebbt faststellt, so ganz ahn Optritte, köönt se gor nich leven. Bi de Wiehnachtskonzerten in Hamborg un in’t Ümland speelt "Plattvent" Stücken vun de fröheren Liekedeler, ne’e Saken, sowat as „Winter Wonderland“ op Platt oder ok plattdüütsche Versionen vun Karkenleder, to’n Bispeel „Es ist ein Ros’ entsprungen“. Un ok de Hit „Wiehnachten in miene Kinnertiet“, den Bert C. Biehl sülvst schreven hett, dröff nich fehlen. De Kolleeg Bernhard Koch hett de Bert C. Biehl, Gert Drögemüller un Uwe Rimsa annerletzt mal bi en Proov besöcht.

Henwies: Wenn Ji de Grupp Plattvent ok mal live beleven wüllt, denn köönt Ji dat an'n 9. Dezember in de Auferstehungs-Kark in Oststeinbeek, an’n 18. Dezember in'e Kunst-Kate in Volksdörp un an’n 20. Dezember in'e Broder-Hinrick-Kark in Langenhoorn.

Weltliteratur op Platt: De Översetter Rainer Kramer

Ein Mann verkleidet als Sherlock Holmes im Gegenlicht © picture-alliance / dpa

Sherlock Holmes op Platt: de Översetter Rainer Kramer hett dat Book "Der Hund von Baskerville" in't Plattdüütsche bröcht.

Wintertiet is de beste Tiet to’n Lesen! Un villicht hebbt Ji ja ok Lust, Jo dat mal wedder so richtig schöön komood to maken: in’n Sessel oder op‘t Sofa mit een godet Book in'e Hand. Woans weer dat to'n Bispeel mal mit een echten Krimi-Klassiker op Platt? „De hünen Hund vun Baskerville” so heet een Sherlock-Holmes-Krimi, den dat nu ok op Plattdüütsch gifft – oder - ok gaanz frisch rutkamen: De sünnerliche Fall vun “Dr. Jekyll un Mr. Hyde”. Översett hett de beiden Böker Rainer Kramer un Benita Brunnert, de stellt Jo den Översetter un siene Böker bi "Wi snackt Platt" mal vör.

Henwies: To köpen gifft dat de Böker vun Rainer Kramer blots bi den Online-Hannel Plattschapp.de.

Den Wiehnachtsmann sien Hütt

Der Weihnachtsmann fliegt mit seinem Rentierschlitten während der Eröffnung über den historischen Weihnachtsmarkt auf dem Rathausmarkt. © picture alliance/dpa Foto: Marcus Brandt

Woneem is egens de Wiehnachtsmann tohuus!?

Hebbt Ji as Kinner ok jümmers wedder doröver nadacht, wo he woll wahnen deit, de Wiehnachtsmann!? In de Geschicht vun Reimer Bull, de Ji düsse Week bi "Wi snackt Platt" op'e Ohren kriegt, geiht dat üm "Den Wiehnachtsmann sien Hütt". Nalesen kann een de Geschichte in dat Book "Wiehnachten so oder so". Dat Book, dat Reimer Bull schreven hett, is rutkamen in'n Quickborn-Verlag, man kriegen deit een dat blots noch antiquaarsch.

Moderatschoon: Jan Wulf

Weitere Informationen