Notoperatschoon

Ralf Spreckels hat bei seinen Enkeln ein Stein im Brett und und das liegt auch an seinem handwerklichen Talent.


Notoperatschoon 2
As uns Enkels kleen weern, hebbt se so lütte Figuren, Deerten ut Hartgummi sammelt. Weer dat Hobby vun vele Kinner. Harr den groten Vördeel, dat wi ümmer wüssen, wat wi ton Gebordsdag schenken kunnen. Dat geev Saurier, Elefant, Nashorn, Koh, Perd, Apen, Giraffen, Hund, Katt, Göös, Anten, Swien un wat weet ik noch. Allens, wat op uns Eer al maal leevt hett un noch leevt.

Kemen de Lütten op Slaapbesöök, hebbt se Kassens vull mit Veehtüüg ton Spelen mitbröcht. Op`n Rasen `n Zoo oder `n Jurässic-Park opbuen hett uns beestig Spooß bröcht.

In`t Huss eenmaal all de Deerten achterenanner opstellt un de Streck nameten. Tweeuntwintig Meter Hartgummideerten! Dörch al de Stuven! Un de müssen denn `n poor Daag so stohnblieven. Wenn een nachts maal rut müss, - hhh- dat Roppedden dä ebenso weh as `n Legosteen ünner de barften Fööt.

An düsse Tiet müss ik denken, as ik in mien Arbeidsstuuv ganz achtern in en Bökerregaal so`n lütt Deert vun domols wedder fünn. En Reh. Och, kiek an, di kenn ik doch! Klaar, op di bün ik in Düstern ok maal pedd. Aua! Un denn hüng dat ene Ohr bloots noch an`n sieden Faden, en Been afbroken.

Meern in de Nacht heff ik as „Veehdokter“ de Not-Operatschoon dörchtrocken. In Keller. In Slaapantog. Dat Ohr? Nich mehr to retten. Müss af. Aver en niees Been müss nödig her. Ik weet nich mehr, wo lang ik an dat Holtbeen arbeid heff.
Teihn Johr her!
Vun dat En-Ohr-Holtbeen -Bambi heff glieks `n Foto över WhatsApp an de Enkels schickt.
Smily, en Hart un dree Dumens torüch.

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch