De Ieswagen-Mafia

"De Ieswagen-Mafia"
"Wat för Kinner goot is, dat is för grootte Lüüd ok nich slecht" So in de Art seggt se dat in'ne Reklaam. Man wenn Du dat 'n lüttbeten ännerst, heet dat: "Nich allens, wat as Kind goot weer is ok för Erwassene goot." Un dor meen ik gor nich Wiehnachten, Achterbahn fohren oder Zuckerwatt mit. Nee, veel konkreter: De Ieswagen.

Wat hebbt wi uns fröher freut, wenn dat in'n Sommer pingeln dä op de Straat. Dat Markstück leeg al op de Kommod blangen de Huusdöör. Blots kenn kostbare Sekunn verleren. Nich dat he an't Enn noch wieder fohrt, un Du mit Tranen op'n Bürgerstigg steihst. Dat is mi blots enmal passeert. Domols weer dat woll so en trurig Bild, dat uns Naversch mi extra en Ies ut ehrn egen Iesschapp haalt hett. Erst dor weer de Welt wedder in Ordnung. Tja, un damals weer de Ieswagen-Fahrer noch mien Fründ.

Hüüt, wo ik sülvst Kinner heff, dor hett he jede Art vun Sympathie verspeelt. Un dat is sien egen Schuld. Denn dreister geiht dat ja nich. Mafia is dat! De sünd so achtertüksch, üm ehr Kugeln to verkopen: Dor fahrt se nu direkt ran an'n Speelplatz un pingelt de Kinner vun de Wipp oder vun de Schuckel. Ja un wenn jedeen vun de anner Kinner wat kriggt, denn kannst Du ja ok nix mehr seggen. Anners steiht dien Kind denn op de Straat un weent, so as ik fröher. Un noch anner vigeliensche Daschenspeelertricks hebbt de Ieswagen-Fohrer op Lager. "Noch Streusel?" fraagt se. Man nich di sünnern dien Kind. Un denn is de Antwort klor. Zack, wedder 30 Penn wech. (Du) Fangst ja nu ok beter keen Diskussion an, wenn achter di de Slang ümmer mehr ward. Dreister geiht dat nich. De hebbt richtig en "an de (Ies)-Waffel"

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch