Inkoopsport

Eenmal nah baben, eenmol nah unnen - strecken! Schullern lockern. Nu hüpp ik noch en beten op de Stee bevör ik to de Inkoopswagen joggen doh. Ik park geern heel achten op den Parkplatz van den groten Supermarkt bi us. In so een Konsumtempel brukst du twee Saken: Utduur un Konzentratschoon! Bi de Körf ankamen nehm ik de Stang noch vör twee bit dree Ballettposen, Allez! Plijee, Plisseee, Potpourri. Hett keen en seggt, dat man bi den Inkoopsmarathon nich ok en gode Figur maken draff. Also rin dor un in Skatebboardmodus: Arms an den Korv afstütten un denn mit "full Speed" dör de Gänge. In dat Gemösafdeel kummt de Slalom um de annern Inköpers.

Dor vörn kummt de Probeerstand för de neiste Limo, in'n Vörbirullern nehm ik een Beker un stött em gierig daal, blangenbi flegen van rechts un links Saken in mien Korf. Dat grote Final van mien Inkoopssport is de Kass. Un hier maak nich ik den Stress, ne! De Kassiererschke süht to, dat se all dat Tüüg gauer över ehrn Scanner treckt, as ik dat woller inpacken kann! Nu kummt de Konzentratschoon, dörholln - un Touchdown mit dat Pack Toastbrot! Ut den lütten Kiosk tegenöver warrt mi en Handdook langt un ik gah in de Afköhl-Phaas heel sutje woller nah mien Auto.

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch