To'n eersten Mal

Schöner Schock am Abend: Carina Dawert ist entsetzt über ein Detail, das sie in ihrem Spiegelbild entdeckt.

To’n eersten Mal
Ik bün in de Baadstuuv, stah vör’n Spegel, un mal mi en Gesicht. Buten schient herrlich de Sünn. Ik kiek mi an. Ik glööv ik bün nu fardig för’t Konzert glieks. Kann losgahn.
Mien Hoor? Frisch friseert. Mien Gesicht? Beter warrt dat hüüt nich. Man egens bün ik tofreden mit dat Ergebnis vun mien Renovierungsarbeit.
Aver momang mal. Wat is denn dat dor in’n Spegel? Is dat dat Lücht oder is dor wat op mien Freese? Erstmal gah ik neger ran an’n Spegel. Dor is doch jichtenswat op mien Kopp. Dor schillert doch wat in mien Hoor! Nee! Dat kunn nich ween. Nee, dat is dat nich. Ik bün nu so neeg an’n Spegel, dat ik mien Aten dorop sehen kann. Dor is nix in mien Hoor. Dat is mien Hoor! Mien eerstet gries Hoor blenkert in de Avendsünn frech so vör sik hen.

Ik maak de Ogen dicht. Dat bild ik mi förwiss blots in. Dat liggt eenfach an de Sünn oder an mien Kortsichtigkeit. Oder villicht heff ik jo düsse seltene Ogenkrankheit vun mien Oma arvt. Nu dreih mal nich glieks dörch, Carina, denk ik so bi mi. Also maak ik mien Ogen wedder op un: Schiet! Dat gifft keen Twiefel. Dat is mien eerstet gries Hoor. Un wat för en! En richtig lang und witt-gries Hoor. Woans hett dat sowiet kamen könnt? Düt gries Hoor hett noog Tiet hatt, üm 20 cm to wassen. 20 cm! Dat gifft anner Lüüd, de wörrn sik över 20 cm bannig freien… Man ik doch nich! Mien Frisöös seggt jümmers, dat en Hoor 1 cm per Maand wassen deiht. Normalerwies bün ik jo nich dull in Koppreken – man dat bedüüt – dat ik al siet een Johr en gries Hoor op mien Kopp spazeren dreeg. Mi warrt övel.

Riet di tosomen, Carina. Erstmal hollst du di en Pinzette. Un achteran wiest du de Lüüd op dat Konzert erstmal so richtig, woans de jungen Lüüd vun hüüt danzen könnt. Levet Öller, so gau kriggst du mi nich!

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch