14 Liter Water je Week un en Barg Knackbroot: Dat schull elkeen för den Fall vun en Katastrooph tohuus hebben. Hamborg sett mehr dorop, dat de Lüüd sülvst vörsorgen doot. Vun dat Thema harr dat de Binnenutschuss. Un Kinner schullen al in’n Schoolünnerricht to weten kriegen, wat bi en Gefohr to doon is. Blangen Stormfloten sünd middewiel ok Pandemien, de Krieg in de Ukrain un Cyberattacken möögliche Gefohren.
Wat warrt Israels Kriegskabinett op de grote Attack vun den Iran an’t Wekenenn antern? Nipp un nau steiht dat woll noch nich fast. Man Israels Regerensböverste Benjamin Netanyahu hett sik woll Malen för en Slag gegen den Iran geven laten. Dat vermellt tominnst israelsche Medien. As dat lett kunn dat Anlagen vun’t Militär in den Iran drapen. Man ok en Cyberattack weer mööglich.
Na de Attack vun den Iran op Israel see ok Hamborgs Binnensenater Andy Grote: Bi dat Islaamsche Zentrum Hamborg mit de Blaue Moschee an de Butenalster, dor mööt nu gau de Dören dichtmaakt warrn. För den Verfatensschuul is dat IZH en Butensteed vun dat iraansche Regime. Tostännig is man dat Bunnsbinnenministerium. Dat is noch dorbi, nipp un nau de Bewiesen antokieken, de bi de grote Razzia in’n Novembermaand sammelt worrn sünd.
In Hamborg beklaagt sik mehr un mehr Lüüd vunwegen de Datenschuul. Dat kann een ut den ne’en Datenschuulbericht rutlesen. Verleden Johr hebbt sik de Lüüd üm un bi 2.500 mal besweert. Dat is goot en Föfftel mehr as in’t Johr tovör. Sünnerlich faken hebbt sik de Lüüd över Google un den Facebook-Konzern Meta beswoort. De Behöörd hett ok in goot 20 Fäll en Verfohren mit Straafgeld op’n Weg bröcht. Alltohoop güng dat dorbi üm 86.000 Euro.
Op den Dom geev dat en Malöör mit en Achterbahn. Dree Lüüd weren güstern Avend in den Höllenblitz fungen. Kott na Klock teihn bleev de Achterbahn mitmal in söss Meter Höögde stahn. Twee Mannslüüd un een Fro seten jüst in dat Fohrgeschäft. Knapp een Stünn hebbt Hölpslüüd bruukt, üm jüm free to kriegen. Passeert is jüm nix.
En Unwedder in’n Süden un Westen vun Düütschland hett en poor ICE-Töög ubremst. Enkelte Bahn-Streken müssen afsparrt warrn. Töög sünd ümleidt worrn. Ok Fohrgäst ut Hamborg weren bedrapen. Welk ICE-Töög kemen Stünnen later an as plaant.
Vundaag hebbt de Wulken de Bavenhand, de Sünn kriegt wi meist nich to Gesicht. Dat gifft wat Natts vun baven, to’n Deel mit Graupelschuern un Blitz un Donnerslag. De Temperaturen schafft dat blots op 10 bet 11 Graad. Opstünns sünd dat 6 Graad in Niendörp. De Wind dorto blaast düchtig. Morgen wesselt sik Sünnn un Wulken af. Dat Ganze bi 10 bet 11 Graad.
