De Olymp'schen Spelen in'n Sommer in Paris kaamt jümmer nöger. Wat dat utsüht warrt ut Hamborg woll mehr as 30 Sportlers an den Start gahn. De Hamborger Athleten wüllt Medaillen bi't Beachvolleyball, Hockey, Rodern un Seilen halen. De Stadt investeert Geld in Millionenhöögde, üm de Olympioniken Stütt to geven. Ünner annern warrt in Groot Flottbeek för 15 Millionen Euro de Bunnsstüttpunkt för Hockey utboot.
In Hamborg un söven anner Bunnslänner hett dat vunmorgen en grote Razzia geven. Dat geiht üm en Slüserbann, de in mehre Länner aktiv is. Se sall mit en Sünnerregel för utlännsche Fachlüüd üm un bi 350, meist chinee'sche Lüüd, dat Verlööf to't Hierblieven verschafft hebben. De Staatsanwaltschop Düsseldörp hett teihn Verdächtige verhaften laten. De mehr as 1.000 Insatzkräft hebbt mehr as 100 Wahn- un Geschäftsrüüm op'n Kopp stellt.
De USA ornt ne'e Strafen gegen den Iran an. Grund dorför is de grote iransche Angreep op Israel an't verleden Wekenenn. Wat dat Witte Huus seggt, richt sik de ne'en Strafen sik gegen dat Raketen- un Drohnenprogramm. Ok de Revolutschoonsgarden un dat iraansche Ministerium för Verdeffernderen wöörn se in't Oog hebben. Man ok de Europä'sche Union will noch mehr Sankschonen gegen den Iran anornen. Dat sä de Butenbeopdragte Josep Borrell. Dorbi geiht dat dorüm, den Iran dat Boen vun Raketen sworer to maken.
Üm un bi 900 Minschen arbeit in de Elvkinnerkitas as Köken- oder Reinigenskraft. Vundaag süllt se de Arbeit ndaalleggen. De Warkschop ver.di röppt to'n Warnstreik op. Dorbi geiht dat üm mehr Geld un üm twee Daag, sik to verhalen. Opgliek dor streikt warrt, kriegt de Kinner Eten, seggt de Geschäftsföhrersch vun de Elvkinner. Dat maakt se mit Huusweertschoplüüd oder Caterers.
Striet ünner dree FC St. Pauli un HSV Fans: In en Linienbus in Schenefeld bi Hamborg hebbt se an'n Avend mit Peperspray spröht. Wat de Füerwehr seggt, kemen dorbi fief Minschen licht to Schaden, dat hett ok anner Fohrgäst drapen. Een vun de Däders kunnen de Polizei faststellen. De Linienbus 184 weer vun Schenefeld in Richt Elvgaustraat un Halstenbeek ünnerwegens.
Borussia Dortmund steiht in't Halvfinaal vun de Football-Champions-League. Der BVB hett Atletico Madrid mit en 4 to 2 slaan. Dormit hett he sien Nedderlaag ut dat Heimspeel wedder goot maakt. De Gegner in't Halvfinaal is Paris Saint Germain.
Sünn un Wulken wesselt sik jümmer wedder af. To’n Nameddag kümmt villicht ok mal wat Natts vun baven un de Temperaturen schafft nich mehr as bet to ölven Graad.
Morgen süht dat ok nich so veel anners ut, tominnst schafft de Temperaturen aver bet to twölf Graad bi’n dullen Wind ut Süüdwest.