Hamborg steiht de Ukraine to Siet - dat wull Börgermeester Peter Tschentscher utdrücken mit sien Besöök dor. De is hüüt fröh to Enn gahn, un Tschentscher is mit de Bahn in Polen ankamen. In de ukrainsche Hauptstadt Kiew hett Tschentscher vörher sien Amts-Kolleeg Vitali Klitschko drapen. Un he hett offiziell dree Hoochbahn-Busse övergeven. Överto schüllt Hamborger Spennengelder dorto bidrägen, dat ukrainsche Deerns un Jungs in en Zentrum för traumatiseerte Kinner Hölp kriegen köönt.
Vele Speditionen sünd in de Brass - un över mehr Bürokratie in'n Hamborger Haven besweert sik Dusende vun Lastwagenfohrers. Op jem ehre Handys mööt se nu dree digitale Utwiesen as App hebben, un de köst ok noch Geld. HHLA, Eurogate un de annern Terminals, de verlangt jeedeen en egne App. So schall dat Smuggeln vun Drogen-Containers verhinnert warrn. De "Verein Hamburger Spediteure" wohrschaut dorvör, dat jümmer weniger LKW-Fohrers oder -Fohrerschen na den Hamborger Haven henfohren wüllt.
Al wat länger söcht dat Bezirksamt Noord na en ne'en Standort, un nu hebbt se een funnen. Dat Amt will in dat ehemalige HEW-Zentrum intrecken, also na'n Überseering in de City Nord. Dat Hoochhuus, wat ünner Denkmalschutz steiht un en Wark vun Architekt Arne Jacobsen is, dat mutt noch energetisch saneert warrn. Totiet sitt dat Bezirksamt noch in Eppendörp - dit Huus is aver marood. Ok en Neebo in Barmbeek harr to Debatt stahn, man sowat warrt to düer.
Grootbritannien kann nu anfangen mit dat ümstredene Afschuven na Ruanda. Ok dat Böverhuus, de twete Parlamentskamer, hett na langet Hen un Her "ja" seggt. Flüchtlinge, de illegaal inreist sünd, köönt nu na Ruanda afschaven warrn - eendoont, wat se dor herkaamt oder nich. Ruanda is dormit per Gesett bi de sekern Herkunftslänner insorteert worrn. Minschenrechts-Organisatschonen hebbt dat scharp kritiseert.
735 Afordente hett de düütsche Bunnsdag. To vele, finnt de Ampel-Koalitschoon un hett en ne'et Wahlrecht beslaten, üm disse Tahl lütter to maken. Verhanneln doröver deit vunaf hüüt dat Bunns-Verfatensgericht. Gegen dat reformeerte Wahlrecht gifft dat Wedderstand. To'n Bispeel wehrt sik de Bunnsdags-Frakschoon vun de Union un ok de Linke gegen dat Wegfallen laten vun Överhang-Mandaten.
Dat Hamborger Landgericht hett en 20-johrigen Mann wegen Mord verordeelt - to en Jugendstraaf vun achteenhalf Johr. Verleden Sommer hett he sien fröheren Fründ ut Kinnertieden in en Park in Borgfell dootschaten. De Richter hett dat Exekutschoon nöömt. Dat de beiden ehemaligen Frünnen över Krüüz weern, dat leeg an Drogengeschäften.
De Dag bringt kuum mal Schuern un mehr Sünn as Wulken – bi bet to 10 Graad. Nu (Klock negen) sünd dat in Fuhlsbüttel 5 Graad. Morgen blots noch wenig Sünn, dorför denn April-Wedder mit Schuern, Graupel un Gewidders – bi nochmal 10 Graad .