Vundaag fiert Hamborg de plattdüütsche Spraak. De 4. Plattdüütschdag steiht ünner dat Motto „Platt för de Stadt“. Anfungen hett de Dag al güstern Avend hier an’n Rothemboom op de NDR-Bühn mit Musik un Geschichten. Bet hüüt Avend gifft dat noch alltohoop 57 Veranstalten: Lesen, Musik, Föhrungen un mehr op plattdüütsch. Informatschonen dorto gifft dat op NDR.de/hamburg un in uns NDR Hamborg App.
Op Autobahnen in Richten Noorden kann dat dütt Wekenenn Stau geven. Op de A1 betert se Schadens an de Noord-Elv-Brüüch ut. Bavento sünd bet morgen Avend Klock teihn twee Fohrbahnen in Richten Lübeck sparrt - ok noch mal an’t tokamen Wekenenn. Stau kann dat denn ok op de Utwiek-Routen geven – also op de A255, de B75 un de B5. Denn wiel de Berlinerdoordammbrüüch afreten warrt, is de Straat Börgerweid bet Maandagfröh dicht.
De Nato hett de Ukraine mehr Luftafwehr Systemen toseggt. Dat hett de Generalsekretär Jens Stoltenberg künnig maakt, nadem de Ministers för Verdedigen Raat slaan harrn. Wann de Systemem levert warrt, dat hett he nich seggt. De ukrain’sche Präsident Wolodymyr Selenskyj harr toletzt seggt, se bruken dringend mehr militär’sche Stütt. Düütschland harr künnig maakt, bald en drüttet System praat to stellen.
De Kampfinsatz vun de Fregatt „Hessen“ in’t Rode Meer is to Enn gahn. Wat de Bunnswehr mellt hett, hebbt se sik hüüt Fröh wedder op’n Weg na Düütschland maakt. De „Hessen“ harr siet Enn vun Februar bi en Militärmission mitmaakt, üm Hannelscheep vör Angreep dörch de Huthi-Miliz to schütten. In‘n August schall de Fregatt „Hamborg“ as twetet düütschet Kriegsschipp in’t Rode Meer schickt warrn.
Mit en Auto, wat in Hamborg klaut worrn weer, hett en 22-Johr olen Mann op de A1 en Verfolgenssjagd mit de Polizei maakt. Bi Sittensen kunnen de Beamten dat Auto avends to’n Bremsen kriegen, man se müssen denn to Siet hoppen, as de Fohrer op eenmal wedder Gas geven harr. Bi Elsdörp hett de Fohrer denn de Kontrull övern den Spoortwagen verloren. He hett noch versöcht, wegtolopen, man se hebbt em denn tofaat kregen.
Dat weer en besünnern Insatz vun de Füerwehr in’t Spadenland: Dor is güstern Avend en Leverwagen för Pizza den Spadenlänner Elvdiek rünnerrollt un twüschen en Muer un en Wahnhuus steken bleven. Mag ween, dat de Pizzabaad vergeten harr, de Handbrems to trecken. De Hölperslüüd weren stunnenlang dormit togang, dat Auto wedder free to kriegen. Dat Huus un ok Lüüd sünd nich to Schaden kamen.
Hüüt hebbt wi af un to Wulken mit Flöög, deels is dat aver ok länger dröög un de Sünn, de schient bi bet to 10 Graad. Opstunns meet wi bi ju in Moorfleet 3 Graad. Morgen is dat eerst fründlich mit Wulken. Övern Dag kaamt mehr Wulken un dor kann ok wat daalkamen bi bet to 10 Graad.
