In Hamborg gifft dat mehr straafschüllige junge Lüüd. De Tahl vun'e Lüüd, de wat maakt hebben schüllt un de se deswegen op'n Kieker hebbt, is verleden Johr üm een Teihntel na baven gahn. Gegen meist 5.700 junge Lüüd is de Polizei vörgahn. Dat sä de Senaat in en Anter op en Anfraag vun'e CDU. Woans is dat to weerten? De Senaat begrünnt de högere Tahl dormit, dat mehr nakeken warrt. De CDU aver süht dorbinnen en Teken, dat Hamborg unsekerer warrt.
Minnstens 87 Perzent för Wladimir Putin – dat is dat, wat bi de Präsidentenwahl in Russland för't Eerste bi rutsuert is. Dormit steiht fast, dat Putin nochmal söss Johr lang an'e Macht blieven deit. An'n Avend hett Putin sien Landslüüd opropen hatt, sik vun'n Westen nich bang maken to laten. Düütschland reageert torüchhollern: Bunnspräsident Frank-Walter Steinmeier will to't Bispeel keen Glückwünsch na Moskau henschicken.
All Lüüd, de dat freewillig wüllt, köönt dor af vundaag angeven, dat se mit en Organspenn inverstahn sünd oder ok kloor "Ne" dorto seggen. Dokters un Krankenkassen verspreekt sik dorvun, dat se denn gau weten doot, wat een Organen spennen müch oder nicht. De Utwies ut Papeer, de blifft aver ok wiederhen gellen.
Man will mal even gau in't Internet gahn un denn duert dat mal wedder teemlich lang, bet sik de Siet opboen deit. Dormit dat Internet in Hamborg för all Lüüd wat gauer warrt, schall de Senaat nu wat doon. Root-Gröön will in de tokamen söss Johr dat Glasfasernett fixer wat utboen as plaant. Dormit dat klappt, schall mit Ünnernehmen starker tohooparbeidt un de Andragsverfahren wat eenfacher warrn. In'e Mitt vun'n Aprilmaand snackt denn de Börgerschop över düsse Saak.
En noch högere Köhlbrandbrüch – dorför sett sik opstunns de Hamborger Senaat in un begrünnt dat dormit, dat de Containerscheep ümmer grötter warrt. Nu düüdt sik an, dat en högere Brüch so as plaant mit 74 Meter Dörgangshöög utreken dee. So as de TÜV för Scheep DNV dat seggt, warrt ne'e Containerscheep neemich nich mehr as üm un bi 430 Meter lang un wörrn denn ok vun'e Höög her ünner de nee plaante Köhlbrandbrüch ünner dörpassen. De Bo is aver noch nich definitiv afnickt.
In Höög vun den Bahnhoff Lütt Flottbeek hebbt unbekannte Lüüd E-Scooters op‘e Schienen smeten. De Fohrer vun en S-Bahn hett dat güstern Avend to laat sehn un is dor denn röver föhrt. So as de Hamborger Polizei dat seggt, sünd all Fohrgäst un de Lokkutscher ahn Schaden bleven. Man de Tog hett dor so dull wat bi afkregen, dat de nich mehr wiederföhren kunn. Wokeen de ganze Saak maakt hebben kunn, dat is noch unkloor.
Na en echt dullen Sünnenopgang vundaag kriegt wi de Sünn dagsöver man nich mehr ganz so veel to sehn. Ansünsten sünd vundaag veel Wulken ünnerwegens, hier un dor kann ok mal 'n beten wat an Regen mit bi ween bi Temperaturen vun bet to acht Graad. Opstunns sünd dat twee Graad in Bardörp (Kl. 9:30). Morgen warrt dat 'n Tick fröndlicher as vundaag un ok 'n Tick warmer bi Temperaturen vun bet to dörteihn Graad.