Al siet Dagen wohrschaut de internatschonale Gemeenschop Israel un Iran, se süllt nich wieder mit Angrepen op'nanner losgahn. Nu hett dat woll in'n Iran dulle Exploschonen geven. Wat to hören is, weern de ünner annern bi de Millionenstadt Isfahan. Dor is en grote Statschoon vun de Luftwaap vun de iransche Armee un ok Anlagen, de en Verbinnen to't natschonale Atomprogramm hebbt. Wat de iransche Weltruumbehöörd mellt, hett de Luftafwehr poor Drohnen afschaten. Wat dat en mööglichen israelschen Gegenangreep na de iranschen Luftangrepen is, dat is noch nich ganz rut.
Twüschen Footballfans un Polizei kümmt dat jümmer wedder to Striet mit Gewalt un Versehrten. Dorüm süllt in Tokumst besünnere Football-Staatsanwälten gegen de Gewalt bi Spelen vörgahn. Dat hebbt de Sportministers vun de Länner vörslaan. Hamborgs Sportsenater Andy Grote sä: Wi hollt in Fankurven Saken ut, de wöörn wi anners keen teihn Minuten dullen. In Hamborg geev dat toletzt in'n November bi Randale an't Millerndoor dörtig Versehrte.
Mit dat ne'e Inkoopscenter in'e Havencity is dat ja nu noch nich losgahn. Dat Ganze is in't Water fullen. Man wat is de Grund? Leeg dat an en Waterschaden oder villicht ok blots an den Bo, de sik dor hentrecken deit? Tominnst warrt veel över snackt. Man fast steiht: Dat gifft Meedverdrääg, dor steiht dat nich binnen, dat se den Schaden torüchkriegen doot, wenn dat Inkoopscenter blots later open maakt warrt. Dat hebbt mehre Hüerslüüd to dat Hamborg Journal seggt. Egens schull dat in'n Mai mit dat Inkoopscenter dor in'e Havencity losgahn, nu warrt dat dormit woll eerst in'n August wat.
De Freewilligen Füerwehren in Hamborg hebbt totiets bannig dormit to doon, dat bi jüm in een Tour inbraken warrt. De Däders hebbt dat in de Fohrtüüghallen bi de Füerwehren op hydraulische Scheren un Spreizers afsehn. De warrt egens dorför bruukt, üm Lüüd ut jemehr Auto to snieden, wenn de dor inklemmt sünd. Man op'n Swattmarkt warrt de Saken as Warktüüg för't Inbreken verköfft. Dormit laat sik Stohlschappen un Automaten knacken.
Hüüt Nacht geev dat merrn in Hamborg en Verfolgensjagd: In Billsteed wullen dree Lüüd een annern Keerl sien Armbandklock klauen. Dorbi hebbt se denn ok en Elektroschocker bi bruukt, wo de Keerl bi to Schaden kamen is. Achteran sünd de dree Däders mit en Sprinter in Richt na St. Pauli utneiht. Över rode Ampeln henweg un deels in'n Gegenverkehr rin. De Schandarms weern jüm mit 14 Peterwagens un mehre zivile Autos achteran. An'n Winklers Platz hebbt de dree Däders denn dat Auto stahnlaten - twee vun jüm hebbt se faatkregen, den Drütten söökt se noch.
Dat Wedder is en natte Saak vundaag. Jichtenswann mal gifft dat ok en Tiet, dor is dat dröög. Allens in allen hebbt wi masse Flagen. Dor kann ok mal en Dunnerslag mit dorbiween. Un dat warrt nich warmer as bet to 11 Graad. Morgen - bin'n Plattdüütschen Dag - wesselt sik Sünn un Wulken jümmer wedder af. Twüschendör kummt ok mal en Flaag langs bi bet to 10 Graad un dullen Wind ut Noord bet Noordwest.
So schafft de Krankenhuusreform den Test in’e Praxis in Hamborg nich – dat hett Hamborgs Soziaalsenatersch Melanie Schlotzhauer seggt, nadem se sik mit Bunnssundheitsminister Karl Lauterbach drapen hett. Lauterbach will, dat Krankenhüüs tohoopleggt warrt un sik bi jümehr Anbott op Hauptsaken fastleggt. Liekers Schlotzhauer dorför is, verlangt se in düsse Saak aver mehr Speelruum för de Fachkrankenhüüs. Bet Enn vun düssen Maand köönt sik de Länner un Verbännen noch to de Vörlaag vun dat Gesett ütern. Anfang Mai sett sik denn de Bunnsregeren dormit ut’nanner.
