So schafft de Krankenhuusreform den Test in’e Praxis in Hamborg nich – dat hett Hamborgs Soziaalsenatersch Melanie Schlotzhauer seggt, nadem se sik mit Bunnssundheitsminister Karl Lauterbach drapen hett. Lauterbach will, dat Krankenhüüs tohoopleggt warrt un sik bi jümehr Anbott op Hauptsaken fastleggt. Liekers Schlotzhauer dorför is, verlangt se in düsse Saak aver mehr Speelruum för de Fachkrankenhüüs. Bet Enn vun düssen Maand köönt sik de Länner un Verbännen noch to de Vörlaag vun dat Gesett ütern. Anfang Mai sett sik denn de Bunnsregeren dormit ut’nanner.
Hamborgs Schölerinnen un Schölers schrievt af vundaag jümehr Abi-Klausuren. Dat is dat eerste Mal siet veer Johr, ahn dat dor Corona noch en Rull speelt un deswegen wat anpasst warrt. Dat bekrittelt aver de Schölerkamer in Hamborg un seggt, dat een dat ümmer noch marken kunn, dat in’e Corona-Tiet Ünnerricht utfullen is. Wokeen domals in’e Middelstuuf ween is, de mutt de Löcker nu sülvst stoppen. Un bavento fallt, so as de Schölerkamer dat seggt, ümmer wedder veel Stünnen ut, wiel dat de Schoolmesters krank sünd.
Dorto gifft dat ümmer wedder ne’e Ideen. Güstern slöög dat Hamborger Immobilienünnernehmen Becken vör, en Investoren-Club, wo denn ok de Stadt mit tohören deit, op’e Been to stellen. Hamborg is aver wiederhen ganz un gor dorgegen, bi den Elvtower vun’t Geld her Stütt to geven. En Vertredersmann vun’e „Hamborg Commercial Bank“ bekrittelt, dat de Eck, dor wo de Elvtower stahn deit, vun allens to wiet weg weer. De Bank glöövt nich mehr an dat Projekt un hett ehren Mietverdrag för den Elvtower oplööst.
De Länner vun’e Europäischen Union hebbt Israel un den Iran dorto opropen, sik nich wieder gegensietig antogriepen. Bi en EU-Top-Drapen hebbt se dorto nu wat seggt un as Papeer tohoop op’n Disch leggt. Dorbinnen steiht, dat se beide Sieden dorto opropen doot, sik bannig trüchtohollen un dat se nix doon schullen, wat de Laag dor in’e Regioon noch slimmer maken kunn. Gegen den Iran will de EU noch mehr Sankschonen op’n Weg bringen.
Weertschopsminister Robert Habeck is ganz unvermodens na de Ukrain hen reist. Hüüt fröh is he in Kiew ankamen. Mit sien Besöök will Habeck en Teken seten. He sä, dat Düütschland de Ukrain op Duer Stütt geven mutt un dat ok geven warrt. Op sien Reis mit dorbi sünd ok mehre Lüüd ut’e Weertschop, so as ut’n Energiesektor un ut‘e Rüstindustrie.
Hamborgs Binnenstadt is, egal wat dat nu de Mönckebargstraat, dat Passagenviddel oder de Havencity is, narms so richtig goot antokieken. Överall steiht wat leer, gifft dat Bosteden oder ok dat nich fardige Westfield-Inkoopscenter lett een den Moot verleren. Man wat kann een dorgegen doon? Dorto maakt Hamborgs Stadtentwickelnsbehöörd nu en Ümfraag in’t Internet. Jede kann dorbi mitmaken un op de Fragen, de dor stellt warrt, op antern. Man mutt blots ’n beten wat an Tiet mitbringen, denn vele Saken sünd vigeliensch schreven.
Veleroorts süht dat hüüt morgen schöön ut, dat is aver noch koolt. Opstunns sünd dat in Hummelsbüddel twee Graad (Kl. 9:30). Twölf Graad warrt dat vundaag noch un de Sünn is ok veel wat to sehn. Man hüüt Namiddag kaamt denn ’n poor mehr Wulken dorto un dat kann denn ok mal dat een oder anner Regenschuer geven, wo denn ok de Wind ’n beten wat duller bi warrn kann. Morgen warrt de Dag denn nich ganz so schöön as vundaag. Dor dreiht sik dat denn so’n beten wat üm – dat heet, dat gifft denn weniger Sünn as vundaag un dorför denn ’n beten mehr wat an Regen - bi Temperaturen vun bet to ölven Graad.