Immobilien in'n Grootruum Hamborg sünd düütlich billiger worrn. Man för veele Minschen sünd se woll jümmer noch nicht to betahlen – ok in't Ümland. So steiht dat in ne'n LBS-Immobilienatlas för't verleden Johr. Dat leeg doran, dat de Tinsen so stegen sünd. Man de LBS schrifft ok, dat de Tinsen wedder fallen schullen un denn weer Köpen ok wedder lichter.
Bi de Öffis in Hamborg warrt dat eerstmal keen Streiks mehr geven. Güstern hefft sik de Warkschop Verdi un de Bus-Bedriever VHH op en ne'n Tarifafsluss enigt. Verdi harr sik graad ok för de Föhrers in'n Schichtdeenst insett. Se warrt nu in de Nacht, an't Weekenend un an Fierdaag Toslääg twüschen fiefuntwintig un föfftig Perzent kriegen.
Ok in'n Arbeitskamp bi de Lufthansa is man sik nu enig worrn. Dor geev dat jo Drapens to'n Slichten – mit dat Personal, dat op de Eer blifft. Dat Ünnernehmen un de Warkschop Verdi hefft sik op de Grundlaag vun en ne'n Tarifverdrag för de bummelig 25.000 Mitarbeiders enigt. Vundaag wüllt se Details in de Saak bekannt geven. De Striet mit dat Boordpersonal un de Piloten bi de Lufthansa-Dochter Discover is man noch nich dörch.
Vunmorgen maakt dat eerst Mal en groot Containerschipp in Haven fast, dat mit gröön Methanol föhrt. De Ane Maersk vun de däänsche Reederee Maersk is 350 Meter lang un schall düütlich weniger CO2 rutblasen as en normalen Frachter. In Haven is se noch bet Sünnavend to sehn.
Dat Hamborger Anti-Mobbing-Programm an Scholen is so goot lopen, dat dat nu in heel Düütschland insett warrt. Ünner't Motto: "Gemeinsam Klasse sein" lehrt Kinner, wat Mobbing is un wat man dorgegen maken kann. Schoolmeesters arbeit tosamen mit jümehr Klassen an Regeln för mehr Respekt. Ok Rullenspeel warrt maakt un över Cybermobbing opklaart. In en Ümfraag vun de Techniker Krankenkass is rutkamen, dat üm un bi jeed süsst Schoolkind mobbt warrt.
So hooch hefft Hamborgs Basketballers in de Bunnsliga in düsse Saison noch nich wunnen: De Hamborg Towers kunnen sik an'n Avend mit 107 to 76 gegen Weißenfels dörsetten. De Towers staht nu op Rang negen in de Tabell.
Vundaag is wedder allens dicht vull mit Wulken – eerst an'n Middag lockert dat mal en lütt beten op. Dat regent ok jümmer wedder un veel Sünn is nich to sehn. De Temperaturen klattert op bet to dörteihn Graad. Morgen an'n Karfreedag is denn wedder allens dorbi: beten Sünn, man veel Wulken; tomehrst dröög, man ok jümmer wedder Regen. Ok dat denn wedder bi bet to dörteihn Graad.