Hamborgs Börgermeester Peter Tschentscher is hüüt Morgen in Kiew ankamen. He will mit den Besöök en Teken setten, wat dat Tohoophollen angeiht un den Städerpakt twüschen Hamborg un Kiew wieder utboen. In’e verleden twee Johr hett Hamborg en ganzen Barg wat an Hölp na Kiew henlevert un op’e Been stellt hatt. Tohooparbeiden doot beide Städer ok bi de Verkehrsünnernehmen un bi de Waterwarken. Över de Reis is bet toletzt nich snackt worrn. Dat leeg an de Gefohren un doran, dormit de Reis ok seker blieven dee.
Woans de Ukrain in ehr Afwehr gegen Russland ok wiederhen Stütt kriegen kann, dor snackt vundaag in Luxemburg de Butenministers un de Minsterlüüd för Verdedigen vun all de EU-Staten över. In en halve Stünn geiht dat los.
Hamborg will den Andeel an Fachlüüd in’e Pleegheimen daalsetten. So as NDR 90,3 un dat Hamborger Avendblatt wies worrn sünd, mööt de Bedrieverfirmen, wat dat Personaal angeiht, bald nich mehr op en Andeel vun föfftig Perzent Fachlüüd kamen, so as dat nu noch de Fall is. So süht dat tominnst en Plaan vör. De Diakonie Hamborg finnt dat goot. Denn in’e Pleegheimen fehlt Arbeitslüüd un deswegen köönt dor üm un bi 1.300 Bedden nich beleggt warrn. So as de Soziaalbehöörd dat seggt, sünd se in düsse Saak aver noch nich ganz fardig mit jümehr Överleggen.
Vundaag treckt de eersten Lüüd in en Quarteer in Niendörp in. Dor schüllt denn Lüüd binnen wahnen, de bet nu keen Dack över’n Kopp harrn un de krank sünd oder Pleeg bruken doot. In dat vörmalige private Seniorenwahnheim in den Garstedter Weg gifft dat 118 Bedden. Bet Midde Mai schall dor denn, so as de Soziaalbehöörd dat seggt, dat halve Huus vull beleggt ween. Enn vun’n Mai will sik de Behöörd denn mit’e Anwahners tohoop an en Disch setten un över de ganze Saak snacken. Denn welk vun jüm säen vörher, dat se mit dat Quarteer nich ganz inverstahn weern.
De Hamborger Füerwehr is opstunns an’e Lohbrügger Landstraat to Gang. Dor hett en Mehrfamiljenhuus brennt. Anfungen hett dat Füer in en Affallcontainer för Papeer in’n Achterhoff. All Lüüd, de dor wahnen doot, sünd in Sekerheit bröcht worrn. Welk vun jüm müssen aver mit en Rookgasvergiften na’t Krankenhuus hen. Nu löscht de Füerwehrlüüd noch de letzten Glootnester. Un en Statiker kickt na, wat een in dat Huus noch wahnen kann oder nich.
Meist all Schölerinnen un Schölers, de na de 5. Klass henkamen doot, de köönt in Hamborg ok dorhen kamen, wo se dat ok geern wullen. Alltohoop sünd dat 95 Perzent, wo dat mit jümehren Wunsch klappen deit. So seggt dat tominnst de Schoolbehöörd. Tellt een de Schölers tohoop, sünd dat üm un bi 16.500 Kinner, de denn af Sommer in’e 5. Klass sünd. Dat sünd 500 mehr as noch verleden Johr: En ne’e Rekoord. Bavenan stünn bi de Stadtdeelscholen de Heinrich-Hertz-School in Winterhuud, wo de Schölers geern hen wullen. Un bi de Gymnasien is dat dat Gymnasium Rahlsteed ween.
Koolt is dat. Opstunns sünd dat dree Graad op’e Veddel un dat geiht denn vundaag noch rop op üm un bi söven bet negen Graad. Hüüt Vörmiddag schient denn ok ümmer noch’n beten wat de Sünn. Twüschendör sünd aver ok veel Wulken ünnerwegens, man dat blifft eerstmal dröög. An Regen oder deels ok Graupel kummt denn hüüt Namiddag noch’n beten wat op uns to. Un tokamen Nacht kriegt wi denn ok noch wedder ’n beten wat an Fröst af, bet dat denn morgen wedder mit en Mix ut Sünn un Wulken bi kuum oder wenig wat an Regen un nich mehr as teihn Graad wiedergahn deit.