Anfang düsse Week müssen veel Football-Fans bi uns in’e Stadt dat eerstmal verknusen, dat de HSV tokamen Saison nochmal wedder in’e Tweten Liga blieven deit. Denn Maandagavend hebbt se in’e Relegatschoon gegen Stuttgart kloor verloren un so denn jümehr letzte Schangs för’n Opstieg verspeelt hatt. To‘n Anfang harrn se de Nees eerst noch vöörn, denn dreih sik dat mitmal un an’t Enn dor hett de HSV in’t Volksparkstadion denn mit een to dree verloren hatt.
// Düsse Week - Der Wochenrückblick auf Platt
Wokeen dicht bi’n Flooghaven wahnen deit, de bruukt starke Nerven. Denn nachts warrt dat bet Enn vun’n Maand noch luuder as normalerwies. Dat is düsse Week Dingsdag seggt worrn. Dat Ganze liggt an de Start- un Lannbahn twüschen Langenhoorn un Niendörp, de kumplettemang opfrischt warrt. Un arbeiden doot se doran denn ümmer twüschen avends Klock negen un morgens Klock söss. De Floogplaan blifft aver so as he is.
// Düsse Week - Der Wochenrückblick auf Platt
Dat wat se "Haus der Erde" to seggen doot, en Neebo vun’e Uni Hamborg för de Klimaforschen un Geowetenschopen, dat warrt noch mal en ganzen Barg dürer as plaant. Dor geev dat Middeweken düsse Week veel Opregen üm. De Stadt rekent bi dat Projekt mit nochmal bet to 85 Millionen Euro mehr wat an Geld. Alltohoop köss de Uni-Bo dormit denn bet to 425 Millionen Euro. Dat is mehr as dubbelt so veel, as egens plaant ween sünd. So as de Senaat dat seggt, sünd Fehlers maakt worrn bi de Lüüd, de dat plaant un ok de Krieg in’e Ukrain möök veel Saken bannig düer.
// Düsse Week - Der Wochenrückblick auf Platt
Üm un bi 27.000 Hamborger Huusholden köönt in Tokunft gröne Fernwarms kriegen - also ahn, dat CO2 freesett warrt. Dunnersdag düsse Week is dat blangen dat Köhlenkraftwark Wedel mit en wat se Wind-to-Warms-Anlaag to seggen doot losgahn. De warrt mit Stroom bedreven, de ut‘e Windkraft kamen deit un dor över is. Jedet Johr köönt so denn mit düsse Anlaag bet to 100.000 Tünnen an CO2 inspoort warrn. Köst hett dat Ganze dörtig Millionen Euro.
// Düsse Week - Der Wochenrückblick auf Platt
In’e Noordkark is jüst veel wat los wegen en apen Breef, den Lüüd schreven hebbt. Welk, de dor ehrenamtlich arbeiden doot, smiet de Verantwoortlichen vör, dat se Hamborgs gröttste Anbott, wo een sik beraden laten kann, jüst tonichtmaken doot. Dat geiht üm de Beradens- un Seelsorg-Steed an’e Hauptkark St. Petri in’e Binnenstadt. De Lüüd föhlt sik dor vör’n Kopp stött, denn de Böverste vun de Steed will en pauschale Grenz bi’t Öller för Ehrenamtliche dörsetten. Dat geiht üm Lüüd, wenn se 78 Johr oolt warrt. De Hauptpastor vun St. Petri, Jens-Martin Kruse, de hollt dorgegen un seggt, dat dat düsse Grenz bi’t Öller ok in anner soziale Inrichtens geven dä.
// Düsse Week - Der Wochenrückblick auf Platt
Europa will de Lüüd, de flücht sünd, dat düütlich sworer maken na de EU hen rintokamen. De Binnenministers hebbt laang tohoopseten un snackt, bet se denn den Weg dorför freemaakt hebbt. Tokünftig schüllt Asylverfohren to’n Deel al an’e EU-Butengrenzen maakt warr. Lüüd, de flücht sünd, kaamt denn in düsse Tiet in Opnahmzentren ünner. Dat Europa-Parlament mutt de ganze Saak nu noch afnicken.
In’e Havenstraat sünd güstern Avend dree Lüüd, wo dat na utseeg, dat se dealen doot, afhaut, as de Polizei jüm nakieken wull. De Dree sünd in’e wat se Volxköök to seggen doot rinlopen. Dat is en Steed, wo sik de linke Szeen drapen deit. An’t Enn sünd denn ok 25 Polizeilüüd dor rin. De ganze Insatz hett denn över twee Stünnen lang duert. Twee Schandarms un een Besöker vun’e Volxköök sünd dor bi den Insatz wat bi to Schaden kamen. De womööglichen Dealers kunnen utneihen.
