Narichten op Platt

Ut Hamborg und de wiede Welt von maandaags bit sünnavends Klock 9.30 - die aktuellen Nachrichten auf Plattdeutsch hören Sie von Montag bis Sonnabend um 9.30 Uhr bei NDR 90,3

Elv kann deper maakt warrn

Nu is de Weg free un de Elv kann deper maakt warrn. Liekers de Ümwelt-Verbännen güstern in Hamborg seggt hebbt, dat se ok gegen de ne’en Plaans klagen wüllt, warrt se aver wat’n Bostopp angeiht keen dringlichen Andrag bi’t Bunnsverwaltensgericht mehr afgeven. Senaat un Oppositschoon is nu een Steen vun’t Hart fullen. Söventeihn Johr lang hebbt se plaant un stünnen in düsse Saak fakener ok för’t Brett.
// Stand: 26.09.2018, Kl. 9:30

Sexuelle Missbruuk warrt to en Last för katholische Kark

Dat Thema sexuelle Missbruuk warrt för de katholische Kark to en Last. Dat bedrüppt ok dat Erzbistum Hamborg. En ne’e Studie hett Licht in’e Saak bröcht. Dordör hebbt se nu dreeundörtig katholische Priester op’n Kieker. Se schüllt von Negenteihnhunnertsössunveertig bet Tweedusendföffteihn alltohoop üm un bi eenhunnert Kinner un Jugendliche wat andahn heben. De Generalvikar Ansgar Thimm sä, dat de Studie nu een ne’e Debatt in’e Kark lospetten warrt ok wat dat Zölibat angeiht.
// Stand: 26.09.2018, Kl. 9:30

Volker Kauder afwählt na 13 Johr in’t Amt

Dörteihn Johr lang wöör he in dat Amt, nu is Volker Kauder nicht mehr de Böverste vun de Unions-Fraktschoon in’n Bunnsdag. De ne’e Chef is Ralph Brinkhaus, wo kener mit rekent hett. De Oppositschoon süht dat as Daalslag för Kanzlersch Angela Merkel. De Hamborger CDU-Bunnsdagsafornte Rüdiger Kruse glöövt aver nich, dat Merkel ehr Autorität in’e Knee geiht, blots wiel se Kauder nich noch mal weer wählt harrn.
// Stand: 26.09.2018, Kl. 9:30

Alsterscheep op lange Sicht mit Battereistroom

Op lange Sicht schüllt op de Alster Scheep föhren, de mit Stroom ut Batterien bedreven warrt. Dat hett de Böverste vun de Hadag-Fähren un vu de Alsterscheep, Tobias Haack, künnigt maakt. In’n Haven warrt se aver jümmers noch mit Diesel föhren. Dat liggt doran, dat de Fähren dor meist veeruntwintig Stünnen lang an’n Dag in’n Insatz sünd. Haack sä, tominnst künnt se dat in’n Moment noch nich ümsetten, dat se denn ok hier mit Stroom versorgt warrt.
// Stand: 26.09.2018, Kl. 9:30

Bill Cosby mutt in’t Kaschott

De US-Schauspeler Bill Cosby mutt för minnstens dree Johr lang in’t Kaschott. En Gericht in Pennsylvania hett den eenunachtig Johr olen vörmaligen Fernsehstar wegen sexuelle Nötigung veruurdeelt un man glieks achteran in Handiesen rutbröcht. Mehr as föfftig Froonslüüd harrn Cosby beschülligt, dat he jüm wat andahn hett. Een Deel vun de Fäll is al verjährt. Cosbys Afkaten wüllt gegen dat Uurdeel aver noch gegenangahn.
// Stand: 26.09.2018, Kl. 9:30

Mehr Geld för Sport in Hamborg

De Hamborger Börgerschop wüll den Sport in’e Stadt in de tokamen twee Johren mit mehr Geld ünner de Arms griepen. Alltohoop staht bavento teihn Komma fief Millionen Euro för ünnerscheedliche Projekte bet in dat Johr Tweedusendtwintig praat. Den gröttsten Deel dorvun wüllt se dorför utgeven, dat Sportanlagen, de de Verenen tohöört, weer op Schick bröcht warrt.
// Stand: 26.09.2018, Kl. 9:30

Dat Wedder för uns in Hamborg

De Dag warrt vundaag ne Tiet lang fründlich mit’n beten Sünnschien. To’n Namiddag hen, teht denn mehr Wulken op, meisttiets blifft dat aver dröög bi nich mehr as negenteihn Graad. Dorbi kann de süüdwesten Wind ok jümmers mal starker opbrusen. Opstünns hebbt wi al negen Graad op Finkwarder. De Utsichten: De Dag morgen geiht deels mit Wulken los, later kummt denn aver ok de Sünn mit rut un dat blifft dröög bi üm un bi warme tweeuntwintig Graad.
// Stand: 26.09.2018, Kl. 9:30

Na Brandanslag in Eißendörp

Na den Angreep, op Mitarbeiter vun de Behöörd in Eißendörp ünnersöcht de Moord-Kommisschoon nu den Fall. En psychisch kranken Mann harr güstern in sien Wahnung twee Beamten un een Oppasser mit en brennboor Flüssigkeit övergaten un ansteken. Dorbi is en föfftig Johr olen Mann sturven, sien Kolleeg liggt noch op Leven un Dood. De beiden sullen den 28-Johrigen afhalen un na en psychatrisch Krankenhuus henbringen. // 25.09.2018 Klock 09:30

Podcast
NDR 90,3

Narichten op Platt als Podcast

NDR 90,3

Ut Hamborg und de wiede Welt von maandaags bit sünnavends: die aktuellen Nachrichten auf Plattdeutsch. mehr

NDR 90,3

Wi snackt Platt

NDR 90,3

Geschichten von uns Schrievers, Klönsnack mit Buurn, Handwarkers und Seelüüd, Leder von Godewind, Richard Germer und Heidi Kabel - jeden Sünndag Klock 8.30. mehr

Hör mal 'n beten to: Plattdeutsche Mittagsplauderei

Die plattdeutsche Mittagsplauderei hören Sie immer montags bis samstags um 13.20 Uhr bei NDR 90,3. mehr

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Dat Plattdüütsche Hörspeel

Familiengeschichten, Krimis und Erzählungen: Alle zwei Wochen sendet jede Landeswelle des NDR ein plattdeutsches Hörspiel. Sehen Sie hier die Hörspiele und Sendetermine im Überblick. mehr