De neegste Pedd bi de Plaans för en ne’e un högere Köhlbrandbrüüch: Na den Senaat hett nu ok de Wirtschopsutschuss vun de Börgerschop jo dorto seggt. Bet to’n Sommer schall noch de ganze Börgerschop afstimmen. SPD-Wirtschopsenatersch Melanie Leonhard sä bi NDR 90,3, se freut sik, dat dat nu vöran geiht. Se wohrschaut aver ok dorför, dat dat Maleschen mit’n Verkehr geven warrt in de tokamen Johren.
Dat Bezirksamt Noord treckt in de City Noord in’t Arne-Jacobsen-Huus. Güstern hebbt se den Vörverdrag ünnerschreven. Bet se ümtreckt, warrt dat aver noch goot dree Johr duern. In’n Sommer 2027 schall dat denkmaalschulte Huus fardig saneert ween. Denn will dat Bezirksamt Noord in söven Etagen vun dat Bürohuus intrecken.
De Mitarbeider vun den AfD-Europaafornten Maximilian Krah, de is nu in Ünnersökenshaft. En Ermittlungsrichter, de hett Haftbefehl gegen den 43 Johr olen Mann rutgeven, wiel he för China spioneert hebben schall. Wegen düsse Saak kümmt de AfD hüüt Vörmiddag in Berlin tosamen. Mit dorbi is ok de Parteispitz: Alice Weidel un Tino Chrupalla un Krah sülvts.
De US-Senaat hett dörför stimmt, de Ukraine noch mehr Stütt to geven. Alleen dorför stellt se rund 61 Milliarden Dollar praat. Bi dat Hölpspaket, dor sünd aver ok noch wiedere 34 Milliarden Dollar mit binnen, de ünner annern för Israel un Taiwan sünd. Nu mutt noch US-Präsident Joe Biden ünnerschrieven, man dat is blots en Formsaak.
De EU will dat bet 2030 hinkriegen, dat dat keen Lüüd mehr ahn Daak övern Kopp geven deit. Dat hebbt de EU-Länner al länger besloten. Man woans schall dat gahn? De Bunnsregeren will dorför vundaag en Naschonalen Akschoonplaan op’n Weg bringen. Dat Hamborger Stratenmagazin Hinz und Kuntz bekrittel dat: „Wi bruukt richtige Hölp, blots Plaans, de langt nich“, so seggt se. In Hamborg leevt 2.000 Minschen op de Straat – un 32.000 in Ünnerkümst vun de Stadt.
Noch knapp twee Maand, denn geiht de Football-Europameisterschop in Düütschland los. Ok in Hamborg gifft dat fief Spelen. Dor schüllt denn sonöömte EM-Volunteers dorbi hölpen, dat de Footballfans sik in Hamborg torecht finnen doot. Mehr as 1.000 vun jüm, de hebbt sik güstern op Kampnagel drapen. 11.000 Freewillige ut de ganze Welt, de harrn sik beworven. An’t Enn warrt 1.600 vun jüm dorbi ween.
Hüüt hebbt wi Wulken un Regen. Namiddags kann dat ok Gewidder mit Hagel geven. Twüschendörch is dat dröög un de Sünn kiekt ok mal dörch. Dat Ganze bi bet to 10 Graad. Opstunns meet wi bi ju in de Havencity 4 Graad. Morgen fangt de Dag gries, man dröög an. Övern Dag kaamt vele Wulken, af un to Regen. Namiddags kann dat gewiddern, twischendörch is dat dröög un ok de Sünn kann dörchkieken bi bet to 10 Graad.
