Wi snackt platt
Sonntag, 29. Januar 2023, 08:30 bis
09:00 Uhr
Dütmal dreiht sik dat üm saftige Appels, üm Plattdüütsch as Spraak - dat dat goot is, dat se snackt warrt, geiht aver ok üm de Fraag, wo se noch snackt warrt. Un wi vertellt Jo noch 'n beten wat över en ganz gediegen Platt - över dat Kedelklopper-Platt.
"Wi snackt Platt"-Schiller
Plattdüütsch is egens en Weltspraak. Noch to de Tiet vun'e Hanse is Platt de Haupthannelsspraak ween. Sülvst in'e Amtsstuven lööp domols allens blots op Platt af: Verdrääg, Uurkunnen un Rekens - dat allens is op Platt ween un dat verdweer dör Europa. Na de Hanse, dor is Platt denn mehr blots noch snackt as schreven worrn un wenn wi nich oppassen doot, denn lett jichtenswann sülvst dat Platt snacken ümmer mehr wat na. Dorüm is dat ok goot, wenn een dor gegenangahn deit. Ut den Grund hett nu dat Nedderdüütschsekretariat tohoop mit den Bunnsraat för Nedderdüütsch "Wi snackt Platt"-Schiller maakt, de wiesen doot: Hier in düssen Laden, in düsse Amtsstuuv oder in düt Huus, dor kann een Platt! Un so warrt de Lüüd denn anröögt, Platt to snacken. Dat eerste Schild hier bi uns in Hamborg, dat hangt an'n Ingang vun de Nedderdüütsche Bibliothek vun'e Carl-Toepfer-Stiftung.
Wenn Ji ok so en Schild bi Jo an'n Ingang vun't Huus ophangen wüllt, denn schrievt en Mail an info@niederdeutschsekretariat.de. Mehr Infos finnt Ji ok hier op de Internetsiet vun't Nedderdüütschsekretariat. So en Schild köst nix, wiggt nich veel un kann een mit normale Kleevstriepens fastmaken. Dat gifft twee ünnerscheedlich Schiller: Wi snackt Plattdüütsch" un "Plattdüütsch? Geern ok mit uns!" - dat hängt dorvun af, wat Ji Platt nu snacken, praten, kören oder spreken doot.
Besöök bi de Obstboversööksanstalt in't Ole Land
"An apple a day keeps the doctor away" - so'n Appel is gesund. Un hüdigendaags, puttegal wat för en Johrstiet, kriggt een den ok ganz licht bi't Inköpen in'n Laden oder op'n Wekenmarkt. Man allens anner as licht, dat is de Arbeit, de dor achter so'n Appel steken deit. Dat Ganze warrt een in'n Laden oder op'n Wekenmarkt gor nich so richtig wat wies. Un ok wenn dor nu in'n Winter in't Ole Land de Appels al lang afplückt sünd, gifft dat dor noch ne ganze Reeg to doon. Gerrit Hoss is nüülichs bi de Obstboversööksanstalt in Jork to Besöök ween un hett sik dat dor mal ankeken.
Plattsnackers in Hamborg-Bargsteed
Dat ne'e Johr 2023 is noch recht wat jung un deswegen kann een dor ok noch goot an dat fasthollen, wat een sik vörnahmen hett, so as: Weniger smöken, mehr Sport maken un vör allen Dingen mehr Platt snacken - denn dat is ok en goden Vörsatz un den kann een nu teemlich nee ok in Hamborg-Bargsteed goot mit Leven füllen. Is noch gor nich so lang her, wo sik dor en ne'en Plattkrink grünnt hett un den stellt wi Jo Sünndag in "Wi snackt Platt" mal för. Benita Brunnert hett mit Wolf Baus snackt, de dor dat Leit hett. Wokeen bi den Plattkrink geern mitmaken müch: Dat neegste Mal draapt se sik dor an'n Dingsdag, den 14. Februaar, namiddags halvig fief in dat Gemeendehuus an'n Volksdörper Damm 268.
Dat Keddelklopper-Platt
Un denn vertellt wi Jo bi "Wi snackt Platt" ok noch, wat dat Keddelklopper-Platt is, wo dat herkummt un wat dat dormit op sik hett. Henning Voscherau hett dor fröher ok al mal in en Börgerschopsitten vun vertellt hatt. Mehr dorto Sünndag in "Wi snackt Platt" - morgens halvig negen bi NDR 90,3.
De Leder in uns Sennen:
Knipp Gumbo - Marie Marie
Knut Kiesewetter - Keen Minsch wuss wo dat geiht
Achim Reichel - Ick bün Kock, segt he
Ina Müller - De Klock is dree
Nick, Yared & Floy feat. The Charchullas - These boys must be free (op Platt)
Moderatschoon: Jürgen Fitschen
Schlagwörter zu diesem Artikel
Plattdeutsch
