Wi snackt platt
Sonntag, 27. November 2022, 08:30 bis
09:00 Uhr
Bi "Wi snackt Platt" vertellt wi Jo dütmal, woneem de Bruuk mit den Adventskranz herkümmt. Dorto hebbt wi noch en feinen Tipp för een St. Niklas oder ok Wiehnachtsgeschenk för Jo un wi vertellt Jo wat över en bayerischen Landsmann, de bi uns hier in Hamborg tohuus is un Platt snacken deit.
De Adventskranz kümmt ut Hamborg
För de mehrsten vun uns höört de Bruuk, dat wi vunaf den 1. Advent een Adventskranz in'e Stuuv stahn hebbt, to de Vörwiehnachts eenfach mit dorto. Man hebbt Ji wusst, dat de Adventskranz ut Hamborg kümmt un en dör un dör hanseatsch Erfinnen is? Paster Friedemann Green weer mal Vörsitter vun de Stiften Dat Ruge Huus bi uns in Hamborg un he hett uns mehr över Johann-Hinrich Wichern sien eersten Adventskranz vertellt.
Peter Huber - een Bayer in Hamborg, de Platt snacken deit
Plattsnacken, dat köönt in Hamborg so üm un bi 100.000 Lüüd. In ganz Düütschland dor sünd dat goors üm un bi 2 ½ Millionen, de dat köönt. Aver: Dat kunnen licht ok noch een poor mehr ween. Denn vele, de hebbt de Spraak in’t Ohr, sünd aver bang vör’t Snacken. Dat dat gor nich nödig is, dat een dor gor nich bang vör ween mutt, vör dat Plattsnacken, dat wiest Peter Huber ut Langenhorn. He is sowat as een Plattdüütschen mit "Migratschoons-Achtergrund". Deen egens kümmt he ut Bayern. Un dat man ok as Bayer, ahn de plattdüütsche Muddermelk, goot Platt snacken kann, dor hett sik Bernhard Koch annerletzt mal vun övertügen kunnt.
"Boßeln - dat Brettspööl"
Op de Landstraaten vun Ostfreesland un dat Ollenborger Land is dat Boßeln een echten Volksspoort – un seker weer ok de een oder anner, de ut Hamborg kümmt, al mol op Boßel-Tour ünnerwegens. Mit dat Boßeln is dat ja so: twee Mannschoppen speelt gegennanner. Se smiet en Kugel un de Mannschopp, de dorbi bi’t Smieten op’t Wenigst bruken un mit de Kugel an‘n Wietsten kamen deit, de winnt. Normalerwies is een dorför op de Landstraaten ünnerwegens – man nu gifft dat sowat as en Boßel-Revolutschoon: Een mutt gor nich mehr na buten to`n Boßeln, denn dat kann een nu ok to Huus inne Stuuv oder an`n Kökendisch maken! „Boßeln - dat Brettspööl!“, so heet en Speel, dat – woans kann dat anners weeen – een Oostfrees erfunnen hett. „Wi snackt Platt“-Reporter Frank Jakobs, de hett dat Speel mal utprobeert.
Henwies: „Boßeln - Dat Brettspeell“ is för bet to acht Speelers in jedeen Öller dacht. 20 Euro köst dat Speel un de Beschrieven dorto gifft dat op Hoch un op Plattdüütsch.