Wi snackt platt

Literaturpries, Godewind un Wandsbeek

Sonntag, 20. September 2020, 08:30 bis 09:00 Uhr

Godewind in neuer Besetzung (v.l.n.r.): Kai Lindner (Keyboards), Anja Bublitz (Gesang), Heiko Reese (Schlagzeug) und Gerrit Hoss (Gitarre und Gesang) © Godewind Foto: Christian Richard Bauer

Literaturpries, Godewind un Wandsbeek

Sendung: Wi snackt platt | 18.09.2020 | 17:00 Uhr | von Wulf, Jan

Dütmol bi "Wi snackt Platt": Hamborger Quickbornverlag kriggt Literaturpries, Besöök bi de Band Godewind un en Törn dör Wandsbeek un Mariendaal.

Bi "Wi snackt Platt" geiht dat dütmol üm den Nedderdüütschen Literaturpries vun de Stadt Kappeln, de düt Johr an den Hamborger Quickborn-Verlag geiht. Denn hebbt wi ok noch de Grupp Godewind bi en Proov hier bi uns in Hamborg besöcht un stellt jümehrn ne´n Song "Wer weiß schon" vör, un wi sünd mal wedder op´n Padd - dütmol glieks in twee Stadtdelen vun uns Stadt: in Wandsbeek un Mariendaal.

Plattdüütsch-Oscar geiht an den Quickborn-Verlag

Peer-Marten und Gesche Scheller freuen sich über den Niederdeutschen Literaturpreis der Stadt Kappeln © Peer-Marten Scheller Foto: Peer-Marten Scheller
Gesche un Peer-Marten Scheller vun´n Hamborger Quickborn-Verlag freit sik över den Nedderdüütschen Literaturpreis vun de Stadt Kappeln

De Nedderdüütsche Literaturpries vun de Stadt Kappeln, de is sowat as de Oscar för de Plattdüütsche Welt. Dörte Hansen mit ehr Böker “Altes Land” un “Mittagsstunde” hett den Pries verleden Johr kregen. Meist dörtig Johr gifft dat den Pries nu.  Wunnen hett den to´n Bispeel ok mal Ina Müller, Gerd Spiekermann, Irmgard Harder, dat Ohnsorg-Theater, Wolfgang Sieg un Sandra Keck - een kunn seggen, dat “Who is who” vun de Plattdüütsche Szene. Un wohen geiht de Utteken düt Johr!? Na Hamborg an den Quickborn Verlag! Dat Ünnernehmen ünner dat Leit vun dat Ehepaar Gesche un Peer-Marten Scheller wöör en “Ermöglicher des niederdeutschen Kulturlebens”, dat hett de Pries-Jury seggt. Ok mit in de Jury weer de Referent för Nedderdüütsch bi´n Heimatbund Sleswig-Holsteen Jan Graf. Bi "Wi snackt Platt" vertellt he, wat den Quickborn-Verlag so besünners maakt.

Kriegen schüllt Gesche un Peer Marten Scheller vun´n Quickborn-Verlag den Nedderdüütschen Literaturpries an´n 6. November in Kappeln. Vun de Veranstalten schall dat denn ok en Livestream in´t Internet geven. Mehr Infos dorto kriegt Ji op de Websiet vun´n Heimatbund Sleswig-Holsteen.

Godewind in ne´e Formatschoon un mit ne´en Song

Godewind in neuer Besetzung (v.l.n.r.): Kai Lindner (Keyboards), Anja Bublitz (Gesang), Heiko Reese (Schlagzeug) und Gerrit Hoss (Gitarre und Gesang) © Godewind Foto: Christian Richard Bauer
De "ne´e" Band Godewind (v.l.n.r.): Kai Lindner (speelt Keyboard), Anja Bublitz (singt), Heiko Reese (speelt Schlagtüüg) un Gerrit Hoss (speelt Gitarr un singt)

De Band Godewind mellt sik ut de Corona-Paus torüch - un dat in en ne´e Formatschoon un mit en ne'en Song. "Wi snackt Platt"-Reporter Christian Richard Bauer hett de Band annerdaags in en lütt Studio in Wandsbek drapen un sik den hochdüütschen Song "Wer weiß schon" al mal vörspelen laten. Mit dorbi weern Sängerin Anja Bublitz, Schlagtüchspeler Heiko Reese, de ne´e Keyboarder Kai Lindner un noch en ne´et Gesicht: de Sänger un Hör mal´n beten to-Autor Gerrit Hoss.

Dat eerste Mal in sien ne´e Formatschoon op de Bühn to beleven is de Band an´n 26. Sptember in´n Alfred-Rust-Saal in Ahrnsborg. Klock söven geiht dat los. Sünd noch en Barg anner Künstlers mit dorbi. För den Avend to´t Thema “Nordische Unterhaltung” anmellen köönt Ji jo op de Websiet vun´t Kulturfestival Sleswig-Holsteen. Un wokeen dor nich dorbi ween kann: en Internet-Livestream vun de Veranstalten schall dat dor op de Websiet ok geven. 

Op´n Padd in Wandsbeek un Mariendaal

Der historische Puvogelbrunnen und die Christuskirche in Hamburg-Wandsbek. © picture alliance/imageBROKER Foto: Christian Ohde
Op ehr Reis dör all hunnertunveer Stadtdelen vun uns Stadt is Benita Brunnert dütmol ünner annern in de Christuskark Wandsbeek to Besöök.

Ok düsse Week sünd wi mal wedder op´n Padd in Hamborg siene Stadtdelen. Dütmol güng dat för "Wi snackt Platt"-Reportersche Benita Brunnert glieks in twee Viddel vun uns Stadt: na Wandsbeek un na Mariendaal. Drapen hett se sik dor mit Gundula Schröder, de ehr allerhand vertellt hett: vun den Dichtersmann Matthias Claudius, den Koopmann un Sklavenhändler Carl Heinrich von Schimmelmann un de Christuskark in Wandsbeek, de Gundal Schröder so an´t Hart liggt.

"Hör mal´n beten to"-Klassiker vun Martin Schröder

In uns "Hör mal´n beten to-Klassiker"-Reeg stellt wi Jo de grootardigen Hör mal-Vertellers ut de verleden Jahrteihnte vör. Düt mal gifft dat en Wedderhöörn mit Martin Schröder. 1990 hett he de wunnerbare Geschicht "Namens" vertellt.

Moderatschoon: Jan Wulf

De Leder in uns Sennen:

Ik föhl mi wohl - Farvenspeel
Dat wer Mai - Ina Müller
Wer weiß schon - Godewind
Freesenhof - Knut Kiesewetter
Wellen, Wind un Meer - Lars & Timpe

 

Weitere Informationen
Schild mit der Aufschrift "Moin" © fotolia Foto: DOC RABE Media

Plattdeutsch bei NDR 90,3

Ob "Wi snackt Platt", "Hör mal´n beten to", "Narichten op Platt" oder unser Wochenrückblick "Düsse Week": hier sind die plattdeutschen Angebote von NDR 90,3 auf einen Blick. mehr

Elbe Landungsbrücken Hamburg © fotolia Foto: dietwalther

Narichten op Platt

Ut Hamborg und de wiede Welt von maandaags bit sünnavends: Die aktuellen Nachrichten auf Plattdeutsch. mehr

Jan Wulf im Studio von NDR 90,3 © NDR Foto: Marco Peter

Das Team der Plattdeutsch-Redaktion

Ob bei den "Narichten op Platt", bei "Wi snackt Platt" oder "Düsse Week" - unser Plattdeutsch-Team zeigt immer wieder, wie lebendig unsere heimliche Muttersprache auch heute noch ist. Bildergalerie

NDR Logo
Dieser Artikel wurde ausgedruckt unter der Adresse: https://www.ndr.de/903/epg/Wi-snackt-platt,sendung1072846.html
NDR 90,3 Livestream

Kulturjournal

19:00 - 20:00 Uhr
Live hörenTitelliste